ГРИБЫ ЛІЩАНКŌВІ Нагадав ми фейсбук образчик, котрыйим быв выклав 3 рокы тōму. Тото стӯл, на кӯсници, у Лысӯй, пōвный, закладеный грибами. Грибӯв що много, вто много, нїщо казати. Тямлю, ги типирь тот динь. Тото была нидїля и я пӯшōв быв сперед няня у Лысу, бод уже читаво быв грибӯв назбирав, та нияк бы їх не знїс. Кōйим выйшōв, вшиткі торбы, ташкы, склали сьме на стӯл. Гріх было не сфотоґрафіровати. Тай добре, ож сяким ся дорадив, бо типирь образчик пōслужив файнōв памняткōв того дне. Нараз пōвім, грибы были усякі, не лише букōві, ай и читаво червенякӯв, айбо такых чистых, ги губка. Упаковалисьме їх пак были у торбы, ташкы, та леґдвы несли у долину. Тяжко было доста двом нести, а єден як бы быв изнїс? Тямлю пак, того місяце читаво ся грибы были верли. И няньо ходив, и я ходив, та усе доста много несли сьме. Сього рōку грибӯв, мож казати, ищи не было. Ōсїнньых точно, айбо ищи їм час. У лїтї ся мало были верли, айбо що вто, лупина. Пару днӯв побыло тай перестали рости. Єдны ся верли тай упстали ся, а мōлōді не росли. Котрых читаво было, тото ліщанковых. Сього літа дожджило, та в єден час росли так, ги бы їх сїяв. Читаво їх было, біда, ож мало пōбудут, та уже черваві. Назбиравим їх быв цїлу ташку, коли-м ишōв дōмӯв из кӯсницї. Выздрів-им быв пиля путе двох молодых ліщанковых. Пак думав си, треба попозирати у загōрōдї, ци там сут. Тай правду-м мав, ож пушōв-им ся натягнути, бо пуд городинōв, у харасничу, й пӯд папōрōтьов было їх дуже много. Вмоминтї на ташку ся было назбирало тай тото-м убагав, убы не были май старі тай розкыслі. Но май ми у гōлōву лізе спомин за другі ліщанкōві грибы, а не сьогорӯчнї. Уже файно не тямлю, бо давно тото было, но знаву якисьме из няньом пӯшли недалеко у Медовый, на Бубенковину, убы найти які грибы. Май ми ся затямило, ож быв у нас малинькый плетеный кошарчик. Видит ми ся, ож и до типирь дись стойит. Усе-м у ньому ходив пасōчку сятити на Великдинь. Тоды ми ся кошар пригодив и на грибы. Припоминав, ож пӯшли сьме были пōпōлудню, мож пōвісти, увичирі. Не тямлю, айбо точно знаву, пӯшли сьме были позад того, ож няньо перед тым изнїс грибӯв, та и минї ся хōтїло ити. Ни знати ци тото была нидїля, ци робочый динь. Пӯшли сьме недалеко, выще хыжӯв, ид «живым городинам» из ліщаня тай буча. Тоды было файно покошено, усяды чисташ. Грибам ся лиш шапкы натїгали. Прӯйшли сьме ся єдным боком межі, другым – тай щōсь у кошарови є. Доброє тото дїло межі – городины из ліщаня, буча тай грабӯв, бо усе там грибы сут. Типирь уже пӯдло, бо много уже наросло хараснича, айбо ни хыба. Тоды, пōмню, походили сьме, назбирали сьме грибӯв, ипен якраз стали у кошарчик, тай пӯшли сьме гет. Грибы є, дяка ми выдыйшла, мож было смїло ити дōмӯв. Ищи пōмню, як-им прōбовав грибы переличити, а пōслїдньоє у гōлōві, якисьме дӯйшли до хыжӯв. Сякый-им дїточый спомин нагадив си днись позад другого спомина через фейсбук. Автор: М.Чикивдя 06 сентября 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
