ПŌБІЛИНЇ ПРИСКІПЫ Ярь - тото не лиш косиці тай тепло. Айно, дуже красно, кōй ся починат усьо рōзпущати, цвітут сливы, чути, як щебечут пōтята тай гудут пчолы. Слїдно, ож природа, всьо дōвкола живоє, прōбудило ся выд сна. Ярь на свойому примірі дає нам надїю, ож по студини тай сырости, настанут теплі, цвітучі дны. У сякі дны приплыват енерґія, котра дає моци вшиткым имати ся до ярьнōй роботы, талантовати. Тōму ярь не лише природна естетика, ай и ярьна робота. Чим лиш выдступили морозы, а пак за дожджами мало пōcсякало, люди ся имили до ґаздованя. Май первоє - позагрібати, позахарьовати у двӯрци, на опшарю. А пак ся харит по хыжах, иде ся гребсти у поле, авадь у берега, ци на кӯсницю пӯдчищати. Є єдна робота, што ся пак май мече у очи - білити прискіпы и дерева. У мене тото ищи єдна асоціація ранньой яри, кōй по садах, берегах, опшарях біліют ся прискіпы тай дерева. Ачий ся многым любит видїти, кōй по берегах лиш біліют пōбілинї звистьов дерева. Даґде білят прискіпы якраз перед Великодньом, у перві дны Страсного тыжне. Читав им у фейсбуці курту статтю єдного из новосных сайтӯв краю. Написали, ож білити прискіпы не треба, тото дурна звычка, што ся упстала из радянського часу. Но тото дїло каждого, ци білити дерева, ци ньет. Є и плюсы, є и мінусы. Из плюсӯв - всокоченя прискіпӯв выд вредитилюв тай за єдным разом красный естетичный ефект. Тōму у пōбіленых прискіпах хыбы ни є, як и ни є біды, кидь їх не білити. Най каждый прочитат вшиткі за тай проти, та рішат. Но а про мене побілинї прискіпы й дерева по опшарях, садах и берегах - ищи єдна асоціація из ярьов, котра лиш радує очи. Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
