ПОМИНАЛЬНА НИДЇЛЯ Перва нидїля за Великōдньом, у каждых реґіонах Подкарпатя, кличе ся инак. Даґде кажут Прōвӯдна (Проводна) нидїля, авадь Фомина (Фтомина). Пувідят ищи и Поминальна, айбо у дуже многых селах, народ ни хōснує якусь назву. Давно чилядь так паровала ся на сяткы, ōбы на Фомину нидїлю мож убстало ся ищи раз паскы істи. Тко умре выд Страснōй пятницї до Прōвӯднōй нидїлі, тот пӯде у рай, бо тоды Царство утворено. Давно ишло ся у тын, та свічкы май часто усі палили пиля єдного гроба, а ни так, ги типирь старавут ся запалити каждōму умершōму. Тай ни усе знало ся, де ипен чилядня похоронено, бо камнянї хресты усї ни гōднї были покласти, а дубовый, и пиля гроба садили дерево, айбо итак были трафункы, ож, из часом, ни гōднї были найти, де похоронено чилядня. Но треба и за днешный час. Типирь чилядь, у пятницю-субōту иде у тын (тимитӯв), ōбы навести порядок на гробах умершых рōдичӯв: пōскōповати бурян, насадити косицї, вымыти, вывтирати памнятник. А пак у нидїлю ся иде у тын. Треба пувісти, ож по усякых селах усьо ся робит иншак. Даґде чилядь просто коли хоче, сього дне, иде та палит свічкы родичам си, даґде сут ōпридїлинї священиком годины и рōблят панахиду (парастас). Приміром, у Березниках, за службōв, священик иде у вышный (старый) тын и служит ся панахида, а пак по вечӯрни, панахида у нижнōму тынови. Та сяк у нас чилядь раз иде палити свічкы у вышный тын, а пак, примірно на 2. годины, у нижный. Чилядь ходит, палит свічкы родичам, а пак до кӯнця парастаса, кажді стōят пиля гроба свого нидавно умершого родича. Авадь ткō сь из хыжі буде стōяти пиля єдного гроба, ткō сь пиля другого, тото дїло каждого. Ги давно, так и типирь, бере ся блюдятко, у котрōму кіндириця, 3. яйця тай свічка ( май часто). Но ни лише сього дне тай восени треба тямити, а усе помянути тай помолити ся за душі умершых. Тай видимее уже кӯлько много старых хрестӯв у тынови, пиля котрых уже рокы ни палит ся свічка… Автор: Мигаль Чикивдя 2021 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
