ДАВНѢ СОЛЬНѢ КОПАЛЬНѢ В НЕРЕСНИЦЯХ Нересниця – село у Тячӯвськōму райōнї Пōдкарпатя. Мнōгі з нас знают за йсе село, май менше, чули за нього. Інтересно, ож кроме Солотвина, у Нересници тоже добывали сӯль. За за нересницькі сӯльнї копальнї є много переказӯв. У часописови «Наш рōдный край» за 1924 рӯк мож прочитати очерк за нересницькї сӯльнї копальнї, кōтрі были в селї давно, ищи при Австро-Мадярщинї, ци й скорше. Очерк ōпублікованый у 1924 рōцї, у ньому ся пише, ож 70-80 рōкӯв тōму назад, ищи великыми масами добывали сӯль. А коли зачали добывати сӯль, не споминат ся. Матеріал у часопис подав Василій Гасинець. Подаву очерк в ориґіналї. ДАВНѢ СОЛЬНѢ КОПАЛЬНѢ В НЕРЕСНИЦЯХ В жупѣ Мараморошской в Тересовском окрузѣ, на прекрасном мѣстѣ лежить село Нересниця. Недалеко од села, окружене довкола невеликыми горами есть долина, народ называе еѣ «Солоный». Ож чому то мысто называеся Солоный? Зато, бо там давно дас 70-80 року тому назад, великыми массами добывали соль. Старѣ люде так говорять, что в тот час было там мале село. Жителѣ того села добывали соль. Старѣ яблонѣ, орѣхы, сливы, далее старѣ фундаменты давных хыж свѣдчать, что там истинно мало бытии колись мале село. Где пропало се село? Старѣ люде говорять, что сесѣ солерубачѣ дуже недбалѣ роботникы. Не кончили свою роботу совѣстно и сяк одноѣ ночи цѣлу копальню залляла вода. Не могли далее продовжати роботую Розселилися на другѣ мѣста, где были копальнѣ. Больша часть пошла до Солотвины, другѣ на Ровносийк, третѣ до Керекгеди. Як розыйшлися, заломилося и то мѣсто, где была их церков, звониця и канцелярія копальнѣ. На сѣм мѣстѣ еще и теперь сть два великѣ озера. Одно з них дас 15-20 метров глубоке и 60-70 метров широке. У сих озерах на сподѣ вода дуже солена и хоснують еѣ люде для худобы и для себе. В роцѣ 1918., коли вышнюю часть Марамороша заняли Румуны, а в Тересовском окрузѣ еще мадярське войсько было, мадяре хотѣли знов отворити солевый окоп. Узяли из собою пару людей и пошли на то мѣсто и зачали копати. Та и найшли соль мѣстами уже на 6-7 метров. Потом коли Румуны заняли и сю околицю ту яму дали заметати, чтобі люде соль не копали и не продавали. Но зато наш народ еще усе мае надѣю и чекае, что там даколи еще знов отворять солевый окоп. Тым велику помоч мала бы Нересниця и цѣлый округ. Не треба бы ити людям у свѣт заробку глядати. Мали бы то дома. У очерку ся споминают два великі озера. Ōни є и по днись. Нахōдят ся на придїлї ( урōчищі) Шовагуськоє. Из сих озер, ги писало ся, люде брали рōпу через кōлōдязї-кадōвбы. Берут рōпу и типирь. Пишут, ож дōвкола озера и нынї мож увидїти останкы деривляных колод, кріпленя шахты, на берегах ся упстали слїды фундаментӯв. Близь є кōлōдязь, котрый выкопали на теритōрії копальнї. Є ищи много переказӯв за нересницьку копальню. Гōвōрят, ож сӯль рубали, а пак на бокорах доставляли ї. У Сōлōнōму были три шахты. Раз ся так стало, ож у дожджливу ōсїнь пōслїдню шахту затопило. Сама копальня ся называла Седлакова, як ся писав ї ґазда. Ги гōднї сьте были прочитати у очерку, ож у Сōлōнōму было село. Село из церкōв, домом Седлака, хыжами-землянками тай копальньов. Пак, через пӯдлый трафунок, пропало, айбо спомин ся лишив. Автор: Мигаль Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
