ОПЕНЬКЫ Сидїв'им рано, пив кавиль, тай такуй листав фейсбук. Натрапив'им там на дуже красный образчик - старый прокрытый мохом пинь, а на ньому краснї ōсїннї, мōлōдї опенькы. Днись, выд рана паде, на двōрі студїнь, сыраво, слякōть. Сяка погода передає ся и на стан чилядня. Айбо, коли'м увидїв образчик, та так, ги кōй ся сонце укаже за хмарōв, нарас ми на душу вылляли теплота тай світло. Вмоминті ся перебив сыравый ōсїнньый настрōй на што сь позитивноє и світлоє. Красота и теплота из образчика передала ми ся и зарядила красным настрōйом на цїлый динь. Не лише естетикōв зōгрів ня образчик, ай нагняв на ня спомины. Хōть я на опенькы не часто ходив, бо они перед буковыми тай березовыми грибами выдхōдят на другый план, айбо є ми ся дащо догадати. Поет Василь Попик написав быв стих, ож межи вшиткыми грибами май читаво любит опенькы. Сяк и много другōй чиляди є, тко вōліє узяти кошары, ци відра, та пӯти си на опенькы. И я, коли'м ищи быв доста малый, пӯшōв'им быв на них у первый раз из бабōв. Было тото давно, не тямлю усьо файно, лише кадрами. Айбо нагадати си дащо мож. Мала быти тото субота. Якраз по-ōсїнньому сыраво тай фрішно. Кōй ся мало угріло, зӯбрали сьме ся, узяли сьме торбы, у них вшитко, що треба, та в дōрōгу. Мы ишли доста дōвго, глядали міста, де бы мож нарізати опеньок. Ити было не тяжко, усяды чисташ, не так, ги типирь. Єдно, што тямлю, хōвзко ся дуже было. Тото якраз ряснї росы по незкошенӯй отаві, а на нюй ся тяжко нормально здержати. Пōхōвзнеш ся раз-два, лиш завіє. Завто треба было ити помалы и фурт позирати пӯд ногы. Я пӯд ногы не дуже позирав, ай роззирав пӯд ліщаня, ож даґде на гриб натраплю. Айбо, ōсїнь пӯзня, грибӯв уже ни было. Я тоды, йой та йой, ни є грибӯв, біда. Айбо, кōй чув'им выд бабы, ож опенькы зараз найдеме, а буде їх много у вōрōсї, та нараз выд ня пӯдлый настрӯй утїкав. Інтерес у минї гōрів. Ищи'м ниґда ни видїв, які тото опенькы, а май інтересно, ож росте їх ворохом много. Думав си, кобы сяк и другі росли. Тай ци годно сяк быти? Ищи сьме мало походили и натрапили на пнї. Там увидїв'им тоты опенькы тай увидїв им тото, ож кӯлько їх читаво, єдна пиля другōї. Баба дōсягнула відро из торбы и начала помалы їх різати. Не тямлю, ци у мене тоже відря было, ци різавим у бабино, айбо тоды'м файно пороззирав тоты опенькы. Ōни были не такі, ги на образчику, ай уже переросли, великі, розкрыті, ги зонтикы. Не было їх, ож ипен Бог знає як много, айбо на єдному пньови, на другому, на тритьому, та мало ся нарізало."Видав, туй тко сь їх уже збирав, бо помало їх - казала ми баба, айбо минї ся видїло тоды, ож їх итак доста читаво. Што было погано, ож хōвзко ся. Тямлю мы тоты опенькы різали у берегови, переходити выд єдного пня до другого было тяжко. Сяк баба кōй ишла, пōхōвзнула ся, та впала там. Исе ми ся май затямило. Напудив'им ся быв тоды читаво. Думав'им си, буде типирь дїла, як дōмӯв пӯдеме? Айбо біды ни было, дōрізали сьме там опенькы тай пӯшли сьме дале. Тямлю натрапили сьме были ищи на єдно місто, де рубали хащу и было там доста много пнюв. Айбо опеньк там уже ни было, повырізали їх. Мало їх там быти, видав, читаво. Треба было туды ити на динь-два скорше. Або що вчиниш? Ниґда не вганеш, коли мож натрапити. Выдты сьме пӯшли пак такуй дōмӯв. Сяк'им ходив у первый раз на опенькы. Зятямило ми ся. Дальше' м на них не ходив ōнь до позалӯтӯсь-лӯтӯсь. Но тото уже друга тема, про що, видав, тоже коли сь пак напишу. Пōвім так, ож ходити на опенькы пораз май інтересно, ги на другі грибы. А кидь їх файно зварити, по вкусу будут на майвысōкōму кулінарнōму уровни. Автор: М.Чикивдя 20-22 октōвбра 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
