ЖЕРТВЫ ХЕЛОУЇНУ Непōнятный чужинськый звык, Хелоуїн, из каждым роком иде и кріпит ся нас. Неґативно ся ставлю до сього дїйства. Май читаво за вто, ож припадат сись западный на поминальнї дны, коли честуєме памнять покойных родичӯв. Нараз пōвім, ож до сього дїйства неґативно ся ставлю, кōй оно ся выдбыват у нас, де му ни місто. А ож тото чинят у Западных странах тай Гамерицї, якōсь ми єдно. Не мōжу критиковати їх, ож сякый у них шабашськый звык. Бо такых звыкӯв, што будут чуднї дїля другых маєме доста. Узяти лиш бетлегем, де учасникы рождественого дїйства убирают ся и у демонӯчных персонажӯв. Тай ипен не так давно, пару дисятиліть тōму, при мервōму чилядникови проводили ретуальнї игры "Лопаткы", Пōвішеник" и другі. Тōму є у нас читаво звыкӯв, призабытых и фунґуючых, кōтрі бы чужі народы не лиш зачудовали ай ужаснули. Єдно лиш, вшиткі наші дїйства упстают ся лише у нас, не мают масового ширеня, кроме діаспор. А Хелоуїн по пōпулярности и з комерційного позираня, нынї на высōкōму уровни. Завто має вже моци доходити до нас, а його масова пропаґанда пробує го у нас закріпити. Ги каждый другый звык, Хелоуїн має свӯй центральный елемент. Главный елемент заґатарного звыка - дыня. Кӯлько мож видїти сього дне образчикӯв дынь, на котрых вырізана страшна тварь якōїсь нечисти. Дынї у Єврōпі тай Гамерицї днись, ипен ги на Новый рӯк ялинкы у нас. Як ся сись шабаш празнує, мене не інтересує. Айбо итак по воли, ци не поволи вшитко знаву, тай знає друга чилядь, бо пропаґанда сього дїйства через кіна, новостї, велика. Сяк давно, тямлю, малым напозираву ся телевізора, вижу, як дыням лиця вырізавут тай кладут усяды, та и я так хōтїв. Видїло ся тото красно тай інтересно. Ищи'м по сто раз звїдав, ож чого тото у нас Хулоуїн ся не празднує. Празднує ся, не празднує, айбо я тоже хōтїв, убы по двōру дыні чуднї стōяли. Ги у Гамерицї! Хōтїв'им тӯлько дынь накласти, ги берізя на Зеленї сяткы. Усе у нас пӯд грезном, восени, ворох дынь было. Я узяв нӯж та ид ним, мякōть выбирати, убы пак тварь вырізати. Пробавали ня перерадити, айбо не удало ся. Хōть вборонили выд ня файнї дынї, бо я ся быв имив до красных, великых. Ищи бы мало, та краснї, на насїння, пикучкы мали бы ся не дуже. Имив я ся пак быв уже до другых дынь, май дрӯбных. Айбо итак, зас пять їх пӯшло. Сяк через пропаґанду, жертвами Хелоїну стало пару дынь. Кӯнчила ся операція, тварі-м повырізōвовав, дынї-м порозокладовав по двӯрцьови, та гет. Тай нараз ми дяка выдыйшла. Не треба ми уже Хелоуїны. На другый динь пак, пороззирав-им єдну дыню, на углу хыжі, кōпнув-им ї так, що лиш ся на дарабчикы розлитіла, тай кониць празднику. Нынї кōй си за исе думаву, та годен им пōвісти, ож треба ся сокотити пропаґанды чужинського западного звыку, убы всокотити дынї! Автор: М.Чикивдя 01 ноября 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
