Монастырь у Імстичеві
Мнōгі из нас были, авать хōть чули за село Імстичево. Село єдно из май знаных у краю. Славит ся ōно свойими архітектурными памнятками, унїкальнōв істōрійōв, красными карпатськыми горами и низинами. Нынї село ся выдносит до Білкӯвськōй громады Хустського райōну.
Є у Імстичеві давный монастырь, записы про котрый пōбліковали ся не в єднӯй книжцї тай часописах. Видит ми ся, ож записы за імстичевськый монастырь буде інтересно прочитати многым. Єден из них хōчу ōпубліковати туй. Нынї для публікації беру ōпōвіданя из книжкы давньої книжкы “Народнѣ оповѣданя про давнину”
Книга “Народнѣ оповѣданя про давнину” – выйшла накладом ЧСЛ. Червеного Хреста в Кошицях з печатнї с. Николая в Пряшеві, у 1925. рōцї. Называют ї ищи “Исторія Подкапатскоѣ Руси в переказах”. Переказы зобрали ученикы Береговськōй ґімназії. А упорядковав профессор ґімназії в Берегōві КОРНИЛО ЗАКЛИНСЬКЫЙ.
МОНАСТЫР В ИМСТИЧЕВІ
Записав од Ивана Ляха з Лукова Бер.ж. Ернест Ґорзов, уч. VII. кл.
Фото. Имстичевский монастырь 1930 год. Русинский Мир.
Сесе было ищи тоды, кōй сюды Татары, песьогōлōвцї ходили.
Из гōрі прийшло сюды двоє людий, кōтрі утїкали перед Татарами, бо бояли ся, што их понесут у полон. Тогды люди дуже бояли ся од Татар, бо кого ōни имили у свōї рукы, бӯльше живого ни пустили.
Тоты люде жили пиля рікы Боржавы, бо давно люде жили коло рік. Пōтōму люде розмножили ся и мусїли ити дале. Єден чōлōвік пӯшōв на ліво; вӯн звав ся Лука и завто село звут Луковом. А другый чōлōвік пӯшōв на право и засновав село Имстичево.
У Имстичеві люди учинили монастыр, бо єден богатый чōлōвік, Йоан Зейкан, передав свōю землю на будованя монастыря.
Люде выбрали місто на березї и там избудовали монастыр. Обвели го мӯцным муром из каміня, а у серединї учинили монастыр из дерева.
Фото. Карта Имстичева в Австро-венгерский период. Русинский Мир
Йоан Зейкан став первым монахом у имстичевськӯм монастыри. Вӯн пак пӯзнїйше став и єпископом мукачовськым.
У сїм монастыри кончили черцї водосята, котрым бісӯв изганяли и мстили ся на них. Завто повстало из першу Мистичево, а пōтōму перемінили на Имстичево.
На сїм містї є и типир другый, великый монастыр, в кōтрӯм и типир черцї изганявут бісӯв и двычі на рӯк ōдбыває ся в нїм великый одпуст.
Фото. Имстичевский монастырь (наше время). Русинский Мир.
Нараз пōвім, не треба брати йсе ōпōвіданя за історичноє жерело. Правдї быти є туй історичный выдголос, айбо ōпōвіданя спринимайме, як ōпōвіданя. У нарōднӯй творьбї много є леґенд и розказӯв творит ся на історичнӯй минувшинї. Но даже из сякōї інформації є што нам ся вчити.
Автор: Мигаль Чикивдя 18 мая 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
