Русинский поэт и писатель М. Чикивдя «Така фурма у руснакӯв, ож тяжко будут робити выд рана до вечера, лиш си у нидїлю тай у сято припочинут…»

Русинский поэт и писатель М. Чикивдя «Така фурма у руснакӯв, ож тяжко будут робити выд рана до вечера, лиш си у нидїлю тай у сято припочинут…»

ВІРОВАНЯ ПРО РОБОТУ У СЯТА

   Така фурма у руснакӯв, ож тяжко будут робити выд рана до вечера, лиш си у нидїлю тай у сято припочинут. Сята, а особенно великі сяткы, наша чилядь ревно держит. Кидь и треба, айбо до роботы ся ни узьмут. 

   Дны перед сятами тай субота уже будут инакі выд простых робочых днӯв. Хōть талантує ся цїлый динь, айбо кōй заходило сонце, лишали ся роботы. Казали, ож сонце уже на нидїлю заходит, та треба ся роботы лишати. Сяк ипен перед каждым сятом: "Пак ищи сь ся ни зашорив? Уже сонце на Петра зайшло!"

   У субōту, увичирі, дзвоны дзвōнят на вичӯрню, та чилядь ся лишат роботы. Кажут, приміром: " Скоро треба дохарити, бо зараз уже дзвонити на вичӯрню буде, - авадь - лишайме ся роботы, бо дзвӯн на нидїлю чути". Як на нидїлю, так дзвонили и на сята.

   Хōть робити на сята ни мож нич, айбо давно, на Юря, у руснакӯв была робота. Но ōна ни была каждоденна, привычна. Люди ишли робити на "Божоє дїло" - орати вдовам. За ораня брати гроші ся ни смїло, усьо ся робило задерь. По-правді исе было доброє дїло, котроє и тяжкōв рōбōтōв чинити было ни гріх. 

   Є єдна робота, котра ся робит каждый Божый динь - тото кōвпут. Ци нидїля, ци сято, ци ōнь Великдинь, рано ґаздыня встає и иде у стайню. Худоба негодована ся не упстане, тōму исе є каждоденноє двох-трьох разовоє дїло.

   Май строго, мож пувісти из страхом, выднōсят ся до Страснōй пятницї. Усї знавут, кōй у церкви вынесе ся плащениця, уже ся треба усього лишати. Тото лиш нынї из Страснōй пятницї вчинили "базарный динь" перед Великодньом, а давно май люди ишли на службу тай нич ни 
їли до плащеницї. Робота ся дозволят того дне, айбо не тяжка, ги сажіня, парованя дрōв и тд. 

 Лиш ся харит по двōру тай похыжи. Айбо, по службі, люди ся лишали и сякōї дрӯбнōї роботы, та ишли плащеницю цюльовати, а потому уже нич ни мож робити. Чилядь приказує, ож Бог карат того, тко што сь робит у вичӯр сиї пятницї. Много ходит межи народом переказӯв, як тко сь ся имав до роботы, кōй ся вернув из церкви, а пак ся такуй того дне з ним ставали тяжкі трафункы. Тōму дуже ся бōязно до сього выдносили.

   Русальна пятниця - исе ни сято, но не так давно и у сись динь чилядь ся старат нич ни робити. Усьо ся зачало через народнї вірованя. Люди вірят, ож сього дне босоркані тай всяка нечистота май читаво у рōцї правлят сабаші тай занимавут ся другыми пӯдлыми дїлами. А тко буде сього дне робити, та чим зайде сонце, усякі демонолоґічнї персонажі будут ся старати такым чилядь што сь поганоє зробити. Из чого сь сякоє вірованя мало было ся вкоренити.

 Май скорше, ож стала ся была якась біда, скорше всього буря из сильным віхром, авадь град. Через якыйсь пӯдлый природный случай, люди зачали думати, ож тото на них нечисть біду нагнала. Дӯйшли до того, ож цїлый динь робили, коли у темных сил наступит главна нӯч у рōцї,завто ся ōни й помстили. Завто и взяли си, у русальну пятницю нич ни робити. 

Треба рōзуміти, ож стало ся исе дись у єднōму містї, а пак из роками сякоє вірованя ся розширило на многї поселення. Многі люди и самі ни знавут выдкі ся узяло сякоє вірованя, айбо як привыкли, так ся й держат. У каждого лиш догадкы выд чого исе вірованя прийшло.

   Сященикы выступавут проти сякого "праздика". Каждый рӯк тōлкувут людям, ож ни треба нечисти сято справляти, на двōрі ни є якогось церкōвного праздника. Айбо треба рōзуміти, ож нарōднї вірованя даколи мавут май сильнї позиції, ги реліґія. У другых случаях ōни рунї межи сōбōв и тїсно изязанї. Тōму и до днись до роботы на Русаля руснакы ся старавут ни брати. Вшитко через вірованя, котроє ся прижило в нарōдї.

   Треба зась спомнити сященикӯв. Давно сященикы мали пōвну власть над парафійōв. Слово сященика у селї быв твердый закон. Тōму дакōтрі звыкы могли ся стройити на прōпōвідї, кōтру люди чули у церкви. Чув'им выд старых людий про сященика, за котрого їх старшина розказовала. Тоды у селї была лиш греко-католицька церква, тото період ищи Австро-Мадярщины. Вӯн у нидїлю, по службі, на наказі казав чиляди: " Вертайте ся дōмӯв, та идїт робити си на хліб". Хліб ся туй рōзуміє усьо їдіня, што хосновали тоды руснакы.

Сященик доводив, ож робити у нидїлю си на їдїня тото ни гріх. Ни гріх робити усьо, што є хосенноє дїля себе тай другых. Ни знати ци быв сякый наказ и на великі сята. Нынї ся упстає лиш по дарабчиках збирати спомины старōй чиляди.

    Кажут, тко у нидїлю робит, тот ниґда из той роботы ни буде мати хосна. Тко пӯде брати булї не буде з них мати нич, бо погнивут. Тай робити тяжку рōбōту не лиш ни мож, ай ганьба. На такого чōлōвіка позиравут, ги на тумана. Кōй тко сь талантує у нидїлю, люди кажут: " На сього нидїлї ни є?! У сято кажут ипен так. Люди вірят, ож брати ся до роботы у сякі дны гріх, за кōтрі Бӯг пошле всякі трафункы тай хвороты.

   Но треба си нагадати за днишнї сїнокосы. Нынї май много людий косит кōсїлками, котрыми за динь мож покосити велизену плōщу. Кōтрі зкосят за динь усьо, бо небо указує на хвілю, пак мавут дуже читаво сїна. Кидь ся погода пōмінят, передавут дождж, тоды кидь и сято, гріх ни гріх, а люди мусят розтрясовати сїно, сушити го, убы доходило. Тōму туй зась маєме выняток.

 Є у нас, ги чилядь каже, малі сята. Тото церкōвнї праздникы, кōтрі ни є по важности такыми, ги двададцїть великых сят. Примір сякых сят Федора, Ярьный Микула и много другых. У сякі сята чилядь ни робит лише при службі. По службі уже рōблят усяку рōбōту лиш ни тяжку. У дакотрых селах у сякі дны и службы ни є, та чилядь си робит, ги простого дне. Но много малых сят через нарōднї традиції тай звыкы так ся руснаками держат, ги великі. В примір наведу Юря, Митра, Михайля - праздникы, храмōві сята многых нашых сел. 

   Дакōтра чилядь у католицькоє Рождество тай Благовіщеня, старат ся ни робити тяжку рōбōту. Ги кажут самі люди: " Рождество великоє сято, а Бог знає котрый календарь добрый, та ліпше ся до тяжкого ни брати". Є такый стериотип, ож руснакы празднувут и католицькі сята, бо много у нас католикӯв. Айбо тото ни так, бо кидь бы так было, та руснакам бы ся нїколи было до роботы добирати. Но є такоє, кидь у селі много католикӯв, та ни быде чилядня рано в час дрыва різати, кōй у них великоє сято. Сяк ся католикы старавут робити и на наші праздникы. Усьо ся стройит на людськōму честованю.

Автор: Мигаль Чикивдя 2023 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Left Menu Icon