ЯРЬ
Проходит динь за дньом. Уже ярь, минула ся зима. Хōть чесно зимы и ни было, хыба у первых числах фебруара застудило. Первого и другого марта было дуже красно, сōнячно. Ги бы точно на дату, ярь из теплōтōв прийшла. Айбо пак зась застудило. Пару раз притрясло было снїгом. Пак сōнїчко и дожджит си. Сяка нистабільна у нас погода. Теплōту чикати ни треба, но и на велику студїнь ни надїйме ся. Єдно мінят другоє. Сяка тото рання ярь.
Кōй файно, забряжчит сōнїчко, та и на души мало май стає добре. Ги бы дарабчик надїї на щось ліпшоє ся пōявив. Коли дожджит - навборот, видит ся, ож небо риве, и душа бы ривала. Ясный ярьный динь хōть и дає у душу мало надії, айбо не дає прōстої, живōтськōї радости. Ни теплота, ни ярьнї первоцвіты, нич нас типирь ни радує. Нич ни є доброго. А тото всьо красноє, што є пиля нас, ни дуже ся мече у очи.
У гōлōву ми приходит спомин, як'им малый усе чикав ярь. Кōй наставало первоє марта, уже ми треба было, убы расты цвіли тай снїг ся потопив. Ги ся хōтїло, ниґда ни было. Тото ня ниждо смутило. Ци то зима, ци лїто, ци ōсїнь, ци ярь - любив'им, што бы ни было, усяды'м глядав плюсы. Айбо коли уже єдна пора рōку прӯйшла, а зачала ся календарно друга, хōтїв им, убы тото было ни лише у калиндарі. Сяк из зимōв тай ярьов. Мириґовало ня, ож як, кидь уже ярь, а ищи ся снїг ни потопив. А што студино? А ци указали ся уже козинкы?
Тямлю, як им пō двӯрцьови снїг розбивав-рōзмітовав, убы ся май скоро топив. А коли ся указовали заплаткы из паллаґом, радовавим ся. Знав им, де у нас фурт указувут ся первоцвіты - козинкы, та сокотив'им. Ни єден динь позирав'им, ци указали ся уже, ци зачали рости. А коли уже, Бōгу дяковати, указали ся и яли рости, радовав'им ся, ги бы ни знати што. Думав си типирь, кӯлько ми мало тоды треба было дїля радости.
Айбо рання ярь ми ся ни дуже любила. Было ищи студино. А коли ся уже снїг потопит, та итак ищи читаво хмуро. Лиш пак потому, кōй зачне усьо оживати, оживат и радость до всього дōвкола. Свїтит сонце, зачинавут цвісти расты, козинкы, цінкōвкаска. Паллаґ починат оживати. Тай чилядь ся розкыват: харили, гребли по двӯрцях, вбирали буль на сажіня. Тото вже было добре. А пак дале усьо ся розпущало, лиш тото уже друга часть яри.
Дав бы Бӯг, убы сьме зась зачали видїти ярь. Ярь из вшиткōв ї красōтōв. Най ярьный дождж ни наганят банованя, смуту на душу. Мирного нам неба. Бо пӯд мирным небом, будеме цвісти, ги весна.
Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
