ЦВІТ ВИШНЇ
Натрафив'им на публікацію, ож у Мукачові тай Ужгороді починавут цвісти сакуры. Скоро тōнкі, но дōвгі, улицї сих варōшӯв укрывут ся густым розовым цвітом. Ци парада буде? Не вто слово! Не лише Ужгород и Мукачево. Много сакур насадили у Сивлюшови, Хустови. Сут ōни уже у Іршаві тай Сваляві. Видав, через рокы, буде у нас сакур бӯльше, ги в Япōнії. У яри наш край буде ся укрывати розовым цвітом, лиш білі гранкы гӯр и полонинськых хребтӯв будут ся указовати из того цвіту. Дуже годно быти и сякоє. Айбо и типир того цвіту выд япōнськых вишнїв доста читаво. У яри смїло мож назвати Пӯдкарпатськый край - малōв Япōнїйōв. Кобы сьме ся годнї ищи кликати "малōв Япōнїйōв" за технолōґіями, уровньом живота тай тым рōзуміньом свїта, што мавут япōнцї, было бы май ліпше. Но Бōгу дяковати хōть за йсе.
Но кроме розового японського цвіту міні ся любит иншный. Вмісто япōнськōї вышнї файно парує и наша. Кōй цвітут вишні, та тото ги бы по селах розōлляв молоко - усяды ся біліє. Чим наші пахнячі вишнї май пӯдлі? Ничим! Кōй потипліє, усьо ся укрыє білым, пышным цвітом, а дōвкола загулят красный аромат. Малинькі наші сады, опшаря, берегы гӯр - межи зелиньов усяды ся вкаже цвіт, над котрым будут играти пчолы. Молочный цвіт, што ги хмары ліг по селах, солодкый аромат, новта ґаздӯвськых пчӯл - но як ни любити теплу ярь? Ищи мало, дасть Бог, дочекаєме ся ї. А раз ся вшитко лиш прōбужат, но скоро й зацвіте, кобы тепло.
Тай не лиш вишні. Подобно цвіту сакур цвітут персикы тай абрикосы. А пышным, білым, ги снїг, цвітом укрывут ся и сливы. Пак мало пōбуде, та яблынї из дичками взьмут на ся білі параднї віґаны. За апріль й май, усьо буде цвісти. Видит ми ся, тоды у нас май файно. Доста ся мож буде напозирати на ярьну красōту, а пак чикати плоды. Бо кидь вишнї білі платя пōмінявут на червині, тоды сміло мож казати, ож ōни не лиш параднї ай хосеннї про нас.
Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
