МАЛЬОВАНЇ ЯЙЦЯ
На Страсну пятницю красили яйця, бо инше нич ни мож было робити. Май рідко красити яйця зачинали красити у читвирь тай субōту. Тых жӯн тай дївок, што красят писанкы кличут писарьками. На тото, ōбы іх мальовати, треба спиршу мати” легку руку”, мати талант, прирōдну вроженōсть до того. Тōму по селах 2-3. писарькы. Ōни малювут задерь,а іх робота, по народных вірованях, заслужена перед Богом жертва.
Красят яйця по вшидкōму Подкарпатю майже єднако. Яйце малювут жилізным пищком воском тай фарбōв. По зваренōму, насухо вытертōму яйцьови тым рōзугрітым пищком мачавут у розтеопленый вӯск и вывōдят усякі приняті рисункы. А пак купавут яйце у малі, котра є червена, сина, жōвта и т.д. Кōй яйця высōхнут, стиравут (вӯск лишат білі партицї). Бӯльше двох фарб ни хōснувут.
За крашанкы тоже у нас знавут, айбо май рідко іх робили. Фарбы чинили из кōріня, листкӯв дерев, коры, цибулины, сушеного расту и так дале. Даколи на тых крашанках выскріптовали рисункы острым предметом. Знаєме ищи за крапанкы, шкрябанкы тай мальованкы. Но ōни ни сут у нас ипен такі “пōпулярнї”, ги писанкы.
Рисункы на яйцях сут усякі, мавут ōни своє симвōлічноє значеня. Май часто можеме увидїти ристинный елемент, а май рідко звірку. Часто ся хуснувут дзвізда, ромбикы, трикутник, ламаня партиця, городинкы, смерека, листочок и так дале. Сут даколи и записы “Христос Воскрес” тай инакі.
Писанкы май хоснувут ся нашōв чилядьōв, ги подарок хриснятам. На Великдинь тай на другі праздничнї великōднї дны, маточкы пиля церкви хōдят та дарят си хриснятам по писанōму яйцю. Кидь хреснят ни было пиля церкви, та маточка вылажовала дакого из своих дїти, ōбы понесли.
Кидь так ставало ся, ож дїтвак умирав, та маточка давала му у руку писанку, ōбы ся му было єчим на тōму світї бавити. Даґде, кидь дїтина умирала, та мальованї яйя давали кōвдошам.
Писанку прячут у ладї до другого Великōдня. Сяк робили, бо вірили, ож тко ї межи цурьом держит, тот буде дуже такый красный ги писанка. Закопаноє сяченоє яйце выдганят град.
На днешный час, бōвтаські чōколаднї яйця замінявут мальованї. По селах мало такых жӯн, кōтрі бы мальовали. Маточкы (нанашкы) на Великдинь, давут хриснятам яйце тай плитку. Яйце ся дарит чōколадноє, рідко тко дарит мальованоє , авадь якось инакоє, бо такōму ся дїти май ни радувут. Датко уже замінят іх просто на чōколаднї плиткы
Автор: М.ЧИКИВДЯ, Матеріал за 2021.
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
