Русинский поэт и писатель М. Чикивдя «Мараморош – пōдкарпатськый край хащӯв, пōвноводных долин тай соли, за кōтру знав цїлый свїт. Знаєме типирь за Солотвино…

Русинский поэт и писатель М. Чикивдя «Мараморош – пōдкарпатськый край хащӯв, пōвноводных долин тай соли, за кōтру знав цїлый свїт. Знаєме типирь за Солотвино…

ДО МАРАМОРОШСКИХ СОЛЬНЫХ ЗАКОПОВ

Мараморош – пōдкарпатськый край хащӯв, пōвноводных долин тай соли, за кōтру знав цїлый свїт. Знаєме типирь за Солотвино май бӯльше як за курортноє селище. Не так давно у солотвинськых копальнях ищи добывали сӯль. А кидь говорити за часы Австро-Мадярщины, ци й Чехословакії, тоды за Солотвино знали ачий у цїлӯй Єврōпі. Сӯль штрекōв прямо из Солотвина возили у мнōгі города тогочасных держав. А істōрія солотвинськых копальнь дōсїгат далекōй давнины. Догадати ся лише за страйк солерубцюв, котрый став ся через пӯдлых орендатōрӯв солотвинськых копальнюв, што не честовали труд людий. Кӯнчив ся страйк 24 септембра 1551.

Фото. Соляная шахта Солотвино. Русинский Мир

У часописї «Наш рōдный край» за 1926 рӯк є ищи єден очерк, што ся дōтулят пōдкарпатськōй соли. Кидь май точно, описує ся інтересный процес добычі соли в солотвинськых шахтах при Чехословакії. У очерку ся твердит, ож Солотвино давало соли не лише Пōдкарпатськӯй Руси, ай цїлӯй Чехословацькӯй державі. Бōгужаль, автор не указаный. Очерк пōдаю в ориґіналї.

До мараморошских сольных закопов.


 Послѣднѣ выбѣжки севлюшских гор та сусѣдного Ґутина коло Киральгазы стискають Тису в узькѣ ворота. Сей переход дагде не ширший 2-4 км. Даколи сѣ ворота не были одкрытѣ. В давно-давных, предисторичных часах были они запертѣ горами. Тиса розрыла их и зробила собѣ дорогу из горыстого Марамороша на широку низину.

Фото. Соляная шахта Солотвино. Русинский Мир


 Через сѣ ворота ведуть ще и нынѣ одинокѣ дороги: желѣзна та возова, якѣ звязують Мараморош из другыми частями нашого краю. Вже в давных часах поставили в сѣ ворота сильнѣ замки, абы боронити переход.Кто пановав сими замками, той быв паном богатоѣ Мараморощины.


 Богатство сего краю лежало не только в уродных полях та буйных лѣсах. Головный скарб Мараморощины то соль. Из сего минералу находяться в Марамороши богатѣ поклады. Вже в давных часах копали в Марамороши соль, та возили в далекѣ краѣ. Возили Тисою на бокорах, або возами, на дорозѣ под хустским замком.
 Нынѣ Мараморошска Солотвина дає соль цѣлой нашой державѣ.

Фото. Соляная шахта Солотвино. Русинский Мир


 В Солотвинѣ, як ученѣ люде твердять, копаль соль вже 3000 роками перед сим. Розумѣєся, того часу копали дуже примитивным способом. Просто одкопали верхнюю землю и выбрали соль из выкопанных ям. Нынѣ копле ся соль вже розумнѣше. Роботников завезе под землю машина (лифт). Под землею суть выкопанѣ довгѣ та широкѣ улицѣ. Там ломлять роботники соль чеканами.

Выкопанѣ кустки розобють на меншѣ. Соль подтягне на поверх землѣ також машина. Головна задача роботников одстранити воду, яка розмыває соль. Вырубана, камѣнна соль повезеся в млин. Сольный млин є у Мараморошским Солотвинѣ и в Оломоуцу на Моравіи. Из млина приходить соль до торговлѣ у видѣ бѣлоѣ муки.


 В Солотвинѣ вырубуєся соли денно на 40 великих, желѣзничных возов. Прото не треба боятися, що незадовго не будеме мати соли. Соль є не только на околици Солотвины, але майже всюды в полудневной Мараморошщинѣ. Давно копали соль коло Хуста, Тячова. На околици Шандрова, Данилова, Круглово, Новоселици суть великѣ сольнѣ озера. Из них порозвожують «ропу» по цѣлой Мараморощинѣ.


Хōснуву образчикы выд The Zemplén Museum

Автор: Мигаль Чикивдя 2023 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий