ЦУРЯ З БОРЖАВСЬКŌЙ ДОЛИНЫ
Кӯлько раз ся у нас говорит за цуря? Ачий тӯлько, ги за ярьованя, сїнокосы и инше ґаздованя. Є народна фіґля, што у многых жӯн май бӯльша журба, бо в нїщо ся вбрати, хōть шіфоны ся ламлют выд цуря. Тай привыкло ся куповати усе новоє, красноє. Инчак нияк. Треба чиляди цуря на сяткы, на гостину, на рōбōту, коли-куды. И кōй ся талантує по двōру, ци иде ся на поле, та хōть-што ся не узьме. Уже не кажу за свальбы, выпускнї, хрестины тай инші великі пōдії. Нынї уже не до сього, война. Айбо до неї тема цуря была дуже актуальна. Привыкла ся чилядь парадити, красно ся убрати. А ищи єдна часть чиляди любит позирати а приказовати – тко як и у що быв убратый.
Кидь пōдумати, та не дуже ся людями споминат, як ся чилядь давно вбирала. Говорит ся лише за днись тай за будучнōсть. А што ся минуло, тото ся лишило в минувшинї. Лиш даколи межи чилядьов заходит бисїда, як тото было давно, тай у що ся вбирали. Но ачий каждый пōвість, ож тото давноє цуря хыба ся упстане у споминах тай у музеях, а хосновати ся не буде . Но тай тото ясно, ож народноє цуря не буде хосноновати ся нынї у первосозданōму видї. Кидь бы узяти ōснōву вбраня, «пӯдшліфовати» пӯд днишньый час, та было бы другоє дїло.
За пōслїднї рокы зачали пропаґовати динь вышиванкы. Читаво за вышиванкы пишут у соцмережах. Доходит тото и до нас через усякі флешмобы, які ся ся прōвōдят у школах, садиках, державных установах. Як привыкло бӯльшōсть нашых людий – што їм пропаґувт, ōни до того липнут, а своє убхōдят. А май часто липнут до чужого, бо чужоє «модноє». Модноє за тото, бо прикапчавут до нього читаву міфів, єдно з другым тай є результат. Хыба не в самых вышиванках, а хыба в тōму, ож чилядь убходит наші варіанты вышиванок, а выберут такі, што и мало не мавут нашōї аутентичности. Тай кидь говорити ипен за Боржавську долину, та у нас ся вбирали у сорочкы из вышивками.
Тай давно наші жоны не лише сорочками могли ся похвалити. Ґунї, петекы, хōлōшнї, ґатї и так дале. Вшитко цуря ōни чинили самі. И людськоє и жӯнськоє, и на сято, и на робочый динь. Ги стара чилядь говорит, давно ґаздыню было видко пō цурю, бо ōна си фамілію вбирала. Кидь усї были вбраті красно, тоды й жона была читава. Не куповало ся вшитко, ги нынї. За исе у ня є тематичный стих мушу го туй лишити, убы пӯдкреслити своє думаня до сиї темы.
Цуря - п`ōвнї шіфон`ы, Ōбув сме купили. А давно наші бабк`ы, Всьо в ручн`у робили. Бо ни были дубльонк`ы, Даже хōть и т`унї. Завто чилядь до зимы Паровала г`унї. Так ми ч`унно, ож тоды В постол`ах ходили, Из кол`ōпняных ниток Сорочечкы шили. Всї кол`ōпнї на терл`ицю, Пак дїлили кл`оча, Тоды щіть й пряди руками - Цїла нӯч робоча. Убы было полотно, Ґазда справит кр`осна. И сор`очкы, и вер`еты - Всього было доста. Жоны дома й ст`упы мали, Чинили хōл`ōшнї, Могли гунї, г`уйōші, Бо были вал`ōвшнї. Мали п`ōлькы, віґан`ы, А люди - бачм`аґы. На нидїлю сорочкы, И файні надр`аґы. Ой таланту наші жоны, Кӯлько пōвно мали, Бо тоды ōни ушитку Файту убирали!
Як ся убирали давно? Усяды по Пōдкарпатю инчако. У Боржавськӯй долинї быв, так пōвісти, єден стиль, на Вōлōвськӯй Верховинї другый и так дале. Я як сам из Гōрішньої Боржавы маву дяку лишити туй куртый назор кушницького учителя Березинського, котрый быв упублікованый у часописї «Най рōдный край» за фебруар 1926 рōку. Чого сь маштабного у очерку не є, но туй добре описано локальноє вбраня карпатськых русинӯв Боржавськōй долины выдкы я є. Ипен за сякоє цуря ми розказовала прабаба тай по днись споминат стара чилядь.
ЯК ОДѢВАЮТЬСЯ РУСИНЫ В ДОЛИНѢ БОРЖАВЫ?
Дѣвка бере на себе бѣлу сорочку, вышивану памутом (заполочею) у взора шев поза иглу. Коло шеѣ (ушийник) и коло рук (запастник) збирана сорочка в дробненькѣ морщины. На том пришитѣ ушийник и запастники вышиванѣ навхрещики.
Сорочку опасує силянкою и прикрыває з верху платом – до роботы синим, на свято в косицѣ. На шею бере монито и дьондь и звязує се пантликом. У косу заплете ще один пантлик и китицѣ.
Ноги обвиває онучою и одѣває постолы. На свято одѣває чоботы, червенѣ або чорнѣ. Онучи и постолы привязує до ноги
волоками из козячоѣ серсти.
Волося мастить мастею и чеше косу. В роботный день бере на голову червену ширинку.
Поверх сорочки одѣвіє уйош из бѣлого сукна, а в зимѣ такоє петек.
Жона одѣвієся як дѣвка, только на голову бере дьондь а поверх того чепак из пантликов и завиваєся у велику темно-сиву ширѣнку. Из ширинки под бородою чинить воля и на плечах звяхує концѣ в один узель. Жона носить також в лѣтѣ короткий кожушок без рукав. Кожух є вышиваный червеным памутом.
Леґинѣ и люде носять в лѣтѣ ґатѣ, шитѣ у 4 полы, в долинѣ ройтованѣ, довгу, так звану нѣмецку сорочк, а ид ней коротку з широкими рукавами. Ошийник сеѣ короткоѣ сорочки вышитый чипчиками и зубчиками, бѣлым памутом.
Дальше беруть на себе широкий черес, выбитый бляшками, шапку (клебаню), постолы ,або бокончѣ. До роботы носят полотнянѣ бачмаґи.
В зимѣ мають ґатѣ у 3 полы и сукнянѣ холошнѣ, и петек.
Всю одежу правять жоны самѣ.
Сяк ся вбирало давно. Нынї ся не вбремеме у петек тай гуню. Айбо, кидь бы быв такый промысел й такі пӯдузятникы-промыслōвцї, што бы чинили народноє вбраня ґунї, петекы, сорочкы, надраґы пӯд днишный час, заговорили бы сьме инчак. Знаву, тото бы было дуже красно. На Мижгӯрськӯй Верховинї у селі Річкы чинят ґунї. Убы у нас ся май масово имили до сього дїла, видит ми ся, ефект бы быв позитивный. Главноє не лишати ся у давнинї, а брати из ниї ōснōву, фундамент и муровати пӯд типирішню мōду. Нашоє народноє вбраня заслужило на новоє дыханя, а не лише місто у музеях.
Автор: Мигаль Чикивдя 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
