Русинский поэт и писатель М. Чикивдя «Динь села – тото є дїло, на пацьоркы вшиткі сміло! Бо вже дниськы Знисїня…»

Русинский поэт и писатель М. Чикивдя «Динь села – тото є дїло, на пацьоркы вшиткі сміло! Бо вже дниськы Знисїня…»

ЗНИСЇНЯ

Четвирь 25 мая. Сього рōку на сись динь припало Знисїня. Знисїня, по церкōвнōму – Вознесеніє Христовоє, єдно великых рӯчных сят. Межи великых сят, Знисїня ся у Березниках май почитат, бо є храмовым праздником у селї.

Днись у нас храмовый праздник, авадь як ищи люблят казати “динь села”. Вознесенська церква у Березниках была ищи давна, забыта уже людьми, греко-католицька. Нарӯк буде сто рōкӯв, як беризняне масово перейшли/навернули ся у православя. Православні вірникы зачали стройити новый православный храм, а греко-католицькый храм из тридцятьма вірниками став філіалом керечанської парафії. У 1933 рōцї была дōмурована й посячена православна Вознесенська церква. Выходит, ож нашӯй церкви уже 90 рōкӯв!

Што інтересно, у греко-католицькӯй церкви служба ся не сперала. Прōдōвжали ся вінчаня тай хрестины. У Березникы ходили служити сященикы из Керецьок. У 1941 рōцї число греко-католикӯв выросло до 124 чōлōвік. Пак выд 1943 до 1945 рōку, у Вознесенську греко-католицьку церкву быв направленый сященик Віктор Дōвган.

Выходит, ож у часы Чехословакії тай другых мадярӯв, у Березниках были дві фунґуючі Вознесенські церкви: греко-католицька и православна. Істōрія березницькых храмӯв пӯдкріплят титул храмового праздника. Кидь бы нас у далекōму 1944 не “освободили”, видит ми ся, были бы у нас и по днись дві Вознесенські церкви. Якбы уже не было, храмовый праздник на Знисїня, кроме вшиткого, має історичный смысл.

Фото. Православный храм Вознесения Христова в Березниках, Закарпатской области. Русинский Мир

Храмовый праздник, ци динь села, кōму як ся любит, усе ся асоціює из чимось добрый и радосным. Про дїти тото, ясноє дїло, пацьоркы! Тямлю ся, як им давно чикав Знисїна, раховав выд Великōдня сорок днӯв, бо буде сято тай пацьоркы. Пак наставало Знисїна, ишло ся ид церкви. А пиля церкви палаток-палаток. Тьма! И туй, и там, доста. А доста накладено и пацьорок, лизалӯв и всякōї всячины. Кроме пацьорок было доста, так пōвісти сувенїрӯв и всякых іграшок. Мусай си фурт было дащо прикупити. Были и грубі надувала, усе ся за них догадув, и всьо што лиш не хоч. Было сяк тай є и по днись. Храмовый праздник у нас, ги у другых селах, без пацьорок ся не убходит. Ōни уже стали, кидь так мож пōвісти, свого рода символом праздника.

Фото. Пацьоркы (бусы) сладкие печеньки на нитке как ожерелье для детей в Закарпатье. Русинский Мир.

Кроме пацьорок часто у село привозили качелї, ид котрым ся сходило читаво дїти. Май рідко ид качелям быв и концер, што пӯдкріпляв праздничну атмосферу.  Знисїна до вōйны было веселым, масовым праздником. Попōлудню, на селї ся тӯлько чиляде збирало, што нїґде стати было. Гуслї, иншу музику, было чути далеко. У Березникы ся сходили гості из другых сел. За храмовый праздник написав’им быв стих:

ЗНИСЇНЯ

Динь села - тото є дїло,
На пацьоркы вшиткі сміло!
Бо вже дниськы Знисїня.
Радӯсть на души у ня.

Ранинько ся треба вбрати
Та ити ся мировати.
Пиля церкви палаткы́
Лизала там и плиткы́.

Тай пацьоркы сут усякі,
Бавкы найдешь си хōть-які.
По мированю - гостина.
Сято, красна нынї днина.

Люду читаво тай сміх,
Бановати дниськы гріх.
Треба в ворох ся зобрати,
Выпити и зась налляти.

Мож си файно выддыхнути,
Туй из центры гуслі чути.
Біжит чилядь позирати,
Гия й красно заспӯвати.

Дïти рвут ся на качилі,
Гостї, Вам выдкрыті двирі.
'Д нам на праздник приходїт,
Радӯсть нашу роздїліт!

Типирькы є служба у церкви тай пацьоркы, но на сьому усьо. Дасть Бӯг, кӯнчит ся вōйна, та празднична ся радōсть ся верне ид нам. Буде вшитко, ги написано выще. Надїєме ся на ліпшоє. Всьых из праздником!

Автор: Мигаль Чикивдя 25 мая 2023 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий

Left Menu Icon