МИКОЛАЙ. Май файнї, радōснї дїтōчі спомины у мене (видав, сяк и у другых), кōй наставав децембер, и ходив Миколай. Лиш наставало первоє децембра, а я уже зачинав говорити, ож скоро Миколай буде ходити. Тоды дны, до Микул, были дōвгі, ги рӯк. Ни мож описати тото чеканя. Слова ми ни перидасти дїтōчї надії на солодич тай файный подарок. И записка, цидола Миколаю, писала ся у перві дны зимы. Писав'им ї, клав на пӯдоконник, а на другоє рано, єї уже ни было. Што'м радый быв! Казав'им, ож усьо, Миколай записку забрав, та точно принесе ми тото, што'м записав. Коли'м ищи ни знав писати, та диктовав'им мамі, што я хōчу, та ōна писала. Догадав' им ся, ож уже, коли'м сам годен быв написати, та кроме тōй єднōй, ищи'м писав запискы, клав на пӯдоконник. Усе'м ся догадовав, ож што бы'м ищи хōтїв. Типирь уже ни пишу цидолы, айбо радӯсть на Миколая у ня ипен така. Бо дав Бог, ож маву малого брата, котрый ипен так типирь чекат Миколая, ги коли сь чикав я. Приятно ми наблюдати, як за цїлый місяць писав запискы, говорив, што бы хōтїв, убы му принїс. Як перед сятом, ни находит си місто, ходит туды-сюды, а у 6. годин каже, ож лігат спати, бо хоче лиш ся прōбудити, кōй Миколай походит. Ипен'им такый быв радый, ги братик, кōй бігав по хыжи, позирав, што принїс. Бо годен'им быв увидїти избōку себе, коли'м тоже сяк бігав тай радовав ся. Дōкы дїтина радує ся, вірує у чудо, доты у ний воістину серенчливі дны. Сяк точно и я чикав, а у нӯч, перед сятом, ни было ми спаня. Радōсть така была, кōй видїв' им на пӯдоконнику забавы, у бōтїнках солодич! Пак'им доста їв солодкого тай бавив ся новыми забавами. А пак у шкōлі каждый сме ся хвалили, ож кōму што принїс Миколай. Дїтōчі спомины: 18. децембра 2021 р.
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
