Сесь місяць нам дав дашто доброго — інтервю«Русинської родины» з ужгородськым ентомолоґом и поетом Володимиром Рошком. Будьте добрі, попозерайте, кедь исьте щи не виділи! За тоты 20 минут доцент Рошко так чарує «науков за вшитко што лізать, скаче, бігать, літать» — тай щи краснов русинськов бесідов — онь им ся забыв, же позераю «Русинську родину», а не «Discovery Channel».
Ба як потому мож думати, же наша бесіда вто знак неошколованости? Туй дуже файно видко, же иппен там, де ся трафляє сесь неправилный стереотип, учителі, медикы, інженеры тай инші фахманы говорять межи собов по-русинськы. Подакотрі попри основної роботы мають ищи хобі — збогачованя русинської културы. А што, кедь даме до вороха єдно з другым?
На теперішньый час маєме малу, айбо наростаючу русинську секцію інтернета, де мож найти дискусії, статі, и другі серйозні матеріалы. У них майчасто читаєме иппен за русинську історію, етноґрафію, язык — словом, розказують Русинам за Русинув (не хочу повісти, же їм штось хыбить!). Айбо важно вказовати, же ай по-нашому мож говорити за вшитко, не лем за народноє житя. Попри того мож, а може й треба розказовати за дизайн, астрономію, рыбарьство, робити урокы анґлійської бесіды, проґрамованя, мальованя… Што думаєте, ци будеме колись писати по-русинськы за вшиткі свої інтересы?
Бізувно, такі ініціативы принесли бы немало хусна. Пак ширеня практичного познаня вто є інтелектуалный вклад у своїх люди. А кидь будеме находити нові способы май широко хосновати наш язык, та може го не забудеме, ай всокотиме собі дале?
Говорім до діла: жебы зачати з себе, из слідуючым своїм відеом парую щи єдно за свуй процес монтажа. Ци не любили бы сьте продовжити? Розкажіть за своє професійноє, творчоє ци иншоє заниманя в тексті вадь на відео! Пак можеме окреме поговорити, де ся ними майліпше ділити (за першый примір годен быти Фейсбук Запрещённый на территории Российской Федерации). Хочу быти вашым першым читательом!
Автор: TOMAŠ KALYNYČ 19 декабря 2020 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения TOMAŠ KALYNYČ в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
