ЕВРОПЕЙСКЫЙ СТАНДАРД –Будьте добры, сеся колбаса куряча? –Куряча. –А ци свѣжа? –Вчора привезли. Будете брати? –Но, привезти привезли легко и вчора, айбо коли выробили? –Выробили позавчора. Вам, прошу, колько зважити? –А ци бизовно из курятины? –Из натуралной. Колько вам зважити? Най ся любит, колбаска свѣженька! –Я чом ся звѣдаю, бо генто купила‑м гибы курячу, а дома никаву – а вто маржинска! –У нас, перепрошую, маржинска не звыкла быти. Колбаска куряча, свѣженька. Та колько будеме брати? –Но, я не говорю, же‑м у вас брала, лем же продавачкы даколи знают быти такѣ непорядны! –Мы не такѣ. Мы обслужуеме позад европейскыма стандардами. Та колько колбаскы береме? –Я чом говорю... мой ґазда, прощен бы... алем принесла‑м минуле колбаскы, та он покушал... а пак мусѣл Рексик из Мурчиком доѣдати... Не зато, же гроши, ай из моралного боку... мерзит чоловѣка, коли го дурят! А мой ґазда... –Я перепрошую, колбасу будете брати? –Яку колбасу? –Курячу. –Кедь она цѣле куряча... –На вшиткѣ сто! Вам колько? –А ци наисто свѣжа? Бо я генто принесла, реку, дому, попахала – из запашком! А мой ґазда... –Я вам ручу, же свѣжа. Днесь рано завезли такой из колбасного цеху, а выробили сночи! –Но, чуйте! Сночи! Та тото значит, на три шихты роблят? Ба чом ото такый похап? Видав мясо даякое гуманитарное, застояное. Вчора на телевизии давали, же на Западѣ встек. –Встек, жоночко, перепрошую, тото на маржину, а у нас мясо курячое! Колько береме? –Та вы, чей, думаете, же куре не хворѣют? Моюй сосѣдцѣ вшиткѣ повыздыхали! –Зато, я позираю, же вы у чорном ходите... Колбасу будете брати?! –Пак вы што на ня гойкаете? Ипен ґазду‑м похоронила, вже‑м думала: нѣкому буде на ня пащеґу роздерати, а ту прошу... И Рексика з Мурчиком не е, боже, боже, сама-саменька... думала‑м хоть туй утѣху найти, а вто, никайте, европейскѣ стандарды! Пахайте самѣ свою шалену колбасу, а менѣ дайте покой! Автор: Тамара Керча
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ Тамара Керча в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
