ПУТЬ У ПАРИЖ Пiтри ланка наламала Вếршнi горы тêнґêри́цї. Завто́ Партiя зобра́ла Хлốпŷв, жŷн и молоди́цї: Убира́вуть, тых майгŷ́дных И́пных, кра́сных ги коси́цї - Вбы ни га́ньба їх загна́ти И францу́зŷм заграни́цю. Дŷйшốв шор и ôд Васи́лю. Ка́жуть му: "Дай Бо́же, Ци́лю !" Йди ану́ш, пони́кай свíта, Вбы-сь ни по́ходив ги дїд ты: О́бчан быв пятьо́х держа́в – Дако думать: "Вíдїв Свiту!", А тот бе́рега Боржа́вы Ниґда-шу́га ни лиша́в. Дôмŷ́ верну́в ся наш Васыль. Сві́тить ся, ги вта форґіта. "У́пив-ись ? Ци што ся ста́ло?" - Звíдать го жона́ Марґіта. "Му́дра жо́но, - каже Ци́льо - Уд те́бе нич ни утайи́ш. Путь нас че́кать, моя мила, Бо йдеме́ мы ...у Париж!" "Ги тŷв ку́рици зêрно́ Й нам ся тра́фило оно́: Ку́фры в ва́ндры бы лади́ти !" - Го́йкали уд щастя дї́́ти. А́йбо ра́дŷсть бы́ла в хы́жи: "Ма́мка з Ня́ньком в путь iду́ть: Чôвкола́ды ôнь з Парижу Ташкы́ пốвнi привêзу́ть !" Кôй у Стары́х дїти́ лиша́ли: Хрести́ли їх и цюльова́ли. Як у́йшли вон із їх обыстя Што “грїх тайи́ти" – зарêва́ли... Як уд сêла́ ся удклони́ли; Самі́ красно́ ся помолили; На куму́ лишили хы́жу И у́дали ся до Парижу. Йщи темно вон. (Готêль «Пети́т»). Мо́рґiтов уже мори́т: "Ва́ську-Сонце, тŷ́лько спиш – Йти бы, ни́кати Париж! До́ма-сь го́ден до́ста спа́ти. Да́ле бу́деш банова́ти!" Нич ны го́ден быв вчини́ти Жонї му́сїв полїви́ти. Раз бы́ла Тốрôня Êйфе́ль. За нив пŷшли́, у Сант-Шапель: Там Лôцї ду́мав йти д прича́щю, Бо зрана бiгав сêґінь на́ще. А да́ле Лувр: .. и "Монна Лїза" Глота́ ôд кốтрюв лїзла й лїзла... Зайшли́ в "Bistrot" туристы сї́сти, Бодай дачого-сь вжек iзїсти. Туй ке́лнер та́куй гурї́ ни́ми, Бо хоче знати штô бы зї́ли. Василь: "Я чув за ваш сохта́ш, Ож йщи нам бу́ндаш-жабу даш... Ра́тоты нам - omelette ! Масла, пíкничкы, baguette ! Тай поку́шав бы'м вино́, Ож яко́є в вас оно́ ! Василь “по Свốму" лопота́в... Француз - у себе штôсь писа́в ... На йсе Марґiта позира́ла Й ни дôвiря́вучи мовчала. "Францу́зьку-сь нич ни хốтїв вчи́ти. У вас урок – бiг-ись кури́ти ..." - Сяк жо́на му́жа докоря́ла. Кôй принесли́ всьо?! ...замовча́ла. Васьо́: "Смiшна́-сь, ги вта дїти́на, Пак і́хня бếсїда - лупи́на!" На йсе, їх ке́льнер на́гле став; По дốброму попозира́в. Розгла́див пе́рстом тôнкí у́ста: "Кобы́ ни Ма́мка была з Ху́ста Выда́в бы бы́ла туй "лупи́на", А ни Прова́нська солони́на!" Мораль у при́шты дуже про́ста – Ож вчи́ти ся нам треба до́ста, Бо и́ншак че́кать нас моро́ка! Исе́, ги-бы́ з єдно́го бо́ка... Но, хвала Бốгу, за вту Ма́мку, Што Путь привŷх ї у Париж, А Ты, "по-На́шому", Соло́дка З дїти́нов сôбí говори́ш! Автор: Петро Береш, 12. октôвбра 2022 рока
Вместе с вами мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/,Питьо Береш, в иных случаях будем обращаться в соответствующие инстанции (админам соц.сетей, и Суд).
