РУСНАКИ-КОСАРІ Тепло́ во́нка, дôщ упа́в. Гібы́ з зе́мли вон кіря́в Траву́ бо́жу. А тота́, Гі збісна́ росте́ густа́. Вы́шша ’д кốлін нагуча́ла. Не дай Бог, бы не упа́ла. Ба́бку прийшốв час гляда́ти, Ко́су фа́єн наклепа́ти. Нốхтьом у ню потягну́ти, Яка во́стра, ра́до вчу́ти. Косарі́ іду́ть ізра́на. Ще ся те́мніє, до Па́на. Іду́ть ско́ро, бы заста́ли Рôсу́ рясну́, бы утя́ли Ле́гко. Бы бы́ла роса́ – Не тупи́лася коса́. Ма́ло за́спані іду́ть Тốпчуть порошаны́й пу́ть. Крок впере́д, махне́ ся ко́са Косарьо́ви спе́ред но́са Кусьо́м гладки́м за роки́, Насу́каным од руки́. Ка́мінь в тốчку цоркони́ть, Путь у бе́рега біжи́ть. Ту сь’ме. Ста́ли, закури́ли. Ко́су на куся́ наби́ли. Клепа́ч пушốв за ремі́нь, В тốчку во́да ка́же “блі́нь”. Ста́ли в шор. Впере́д дітва́к. Бы учи́вся, небора́к. Бы ’го ста́ршый рốно гна́в, П’яты́ зза́ду пудтина́в. І пушли́ валы́ стина́ти, Тра́вы зачали́ ліга́ти. Ко́са бли́снула і шва́к, Траву́ бры́твать ле́гко та́к. Фа́йно збốку позера́ти. За косо́в валы́ ліга́ти, На́шороко зачина́вуть. Ле́гко бры́твлячи, вбаля́вуть Золоту́, густу́ ута́ву. Посу́шиться, буде́ в сла́ву. Дốвгий вал. Уже ся стя́в. Травы́ в жме́ню коса́рь взя́в. Уте́р ко́су, та гі тва́рь, Навостри́в ї. Став коса́рь Вжек на дру́гий вал коси́ти. Так ся звы́кло в нас роби́ти. Шва́кать ко́са, трава́ лі́гать, Ко́са ту́ды-сю́ды бі́гать. Утя́в коса́рь, крок впере́д, На чоло́ви, та гі ме́д, Роса́ збе́раться пома́лы. А́нде кốрчі край вказа́ли. Хва́ла Бốгу, утяло́ся. Со́нце во́соко. Впекло́ся. Мош спочи́ти, ко́су зби́ти. І думу́ ся гет лади́ти. Ґазда́ – Дя́куву – пуві́в. До́ґде єдному́. Присі́в. Жона́, ді́ти вжек розми́чуть, Розтрясу́ть ай побыры́чуть. Сі́на ву́стане кôрốві. Най буду́ть вшы́ткі здôрốві. Закури́ли. Постоя́ли. У село́ потараґля́ли, Фіґлю́вучи з молодо́го. Як у вал ся бра́ло мно́го. Як ся ни́шком обзера́в, Бы п’яты́ ’му не одтя́в Зза́ду, што ішốв коса́рь. Настраше́ну мав вун тва́рь. Як ся ко́са ’му тупи́ла. Котра́ ді́вка ся люби́ла? Прийшли́ думу́ од ґаздо́ви. Прикла́лися од вино́ви. Кру́мплі з ра́тотôв заї́ли. Ма́ло ще полопоні́ли. Молоды́й пе́ла стола́, Ру́ки ’му, гі желіза́. Боля́ть так, што вôнь пічу́ть. Ста́рі косарі́ сміву́ть. Не боли́ть їх дốкус ни́ч. Попива́вуть субі́ фри́ч. А́ни слі́дно, што роби́ли, Кібы́ тре́ба, ще коси́ли. Розыйшли́ся, ко куды́. Ще робо́ты у блуды́. Звы́чай, помочи́, старе́зный, У русна́ку вун добре́зный. Хва́ла Бốгу, ще опста́вся. Молоды́м бы переда́вся. Автор: Володимир Рошко
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Володимир Рошко в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
