М. Чикивдя об урожае винограда в Закарпатье «Помалы достигат у нашōму двӯрцьови грезно. Бōгу дяковати, сього рōку дуже рясноє…»

М. Чикивдя об урожае винограда в Закарпатье «Помалы достигат у нашōму двӯрцьови грезно. Бōгу дяковати, сього рōку дуже рясноє…»

ДОСТИГАТ ГРЕЗНО - ВИНОГРАД

   Помалы достигат у нашōму двӯрцьови грезно. Бōгу дяковати, сього рōку дуже рясноє. Сяк, видав, у каждōму двōрі, пиля хыжі, тай саду, убпалювут ся ряснї стручкы грезна. Тай нич, ож суш была, вшитко вродило: яблыка, дичкы, сливы, айва тай ищи й виноград. 

   Ба што из грезном пак будеме робити? Та каждый тко што. Ткōсь пӯрве та подавит на вино, ткō сь на сок, а ищи датко кампōту си наварит, авадь инак кажучи узвару. Но закі ищи достигат, та ни будеме го кывати. Хыба, не гріх, усе си по стручкови вырвати, авадь пару достиглых бōрбульок выд стручка, та усе изїсти. Сяк привык каждый робити.

   Я дуже люблю у смак їсти достиглоє, наллятоє соком тай пропитаноє сонячным теплом грезно. Тоды ōно смачноє а солодкоє, ги мід. Но тай, кōй ся лиш убпалює, та фурт си вырву, як без того. Тямлю, як давно, чим ся грезно убпалит на вершанцї, нараз'им просив, убы го нарвали, бо хōтїв'им їсти. Та пак няня припирав лӯтру, ліз ид гōрі, убы вырвати пару стручкӯв грезна. Їли сьме го пак усї. А уже восени, брав кошар, та пōвный го нарве, файного, сочного грезна. Но тоды уже пристистигали стручкы издōлӯв, кōтрі'м фурт убрывав, айбо ни были такыми рясными, як из вершанкы.

     Што ищи треба написати, у Березниках рідко у кого рōстут сорты стōлōві, ачий дись-не-дись, у дакого. У каждōму дворови посаженоє грезно, айбо лише виннї сорты. Як ся ōни кличут, не знаву, тōму написати'м ни годен. Привыкли сьме казати "чорноє" тай "білоє" грезно (білоє стрічат ся рідко).  За виноград винных сōртӯв кажеме "грезно", а за столовых - "виноград". Май давно грезно раховало ся чимось свойим, домашньым, а стōлōві сорты, виноград, быв хыба на великых гостинах тай свальбах. Даколи го везли у бōвты, айбо чилядь ни дуже куповала, бо цїна за нього велика. 

     Нынї виноград уже май дōступный тай починавут го садити дома. Айбо столовым сортам треба ся ищи прижити у пӯдполонинськōму селі боржавськōї долины. Туй му ни хватат сōнця тай теплоты, кидь поруняти из нижнянськыми районами краю.

   Ни знаву, коли у нас зачали садити грезно, тко ся первый дорадив го посадити у гурішньому Мараморошови. Айбо ōно ся прияло, росте и красно родит. Тай хыбы ни є, ож росте у доста гӯрськōму реґіōнї. Типирькы виноград, авадь грезно, ги привыкли сьме туй казати, є єдным из народных симвōлӯв. Садят го не лише завто, убы пак вино было, ци сок, ай и завто, бо сяк у нас принято. Грезно росте у каждōму двӯрцьови тай є великōв окрасōв цїлого опшаря.

Автор: М.Чикивдя 09 сентября 2022 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий

Иконка левого меню