Лежала книга на столї, Старинька, чорна, хоснована, Удну в нюв буквы гет чудні – «Хлѣбъ души» ся называла. Не розумів ся нич дїтвак, Тай звідать дїдика дїтина: «Ачий йсе, дїдику, и є антична бисїда Русина?» Старинькый каже му на вто: «Пак Ты гет мудра в нас дїтина! Бо й сись язык, што туй го видиш, Є тоже рÿдным про Русина! Сїдай, ануж, на ладу файно! Гадкуй лише, обысь не впав! Ти поприказуву, як было В часах, кой правив Растїслав». Тот пан, прощÿн бы, Растїслав, Што знав ся йщи писати Растїк, Быв славным князьом Мораван, Хоть обставав вазалом франкськым. Позад того й чилядь містну Навертали д християнству Католицькі місіонарї, Што ишли д ним из Баварська. Слабо в Франкÿв йшла робота Межи западных славян, Бо за їхньым сохташом Бога мож было славити Лиш латинськым языком. Знаєме из документÿв, Ож помежи нас, славян, Окрюм вчителюв нїмицькых Были місіонарї всякі: Были «зъ влахъ» и были грицькі… Айбо чилядь «неславянська», Мусай туй ти уповісти, Была дуже-дуже панська: Они вчили панÿв в градох, Де їм файно ся жило. Нїшто довго туй гадати – Не тягло їх д людьом простым, Ид поганÿм у село. Поникав на вту «роботу» Мудрый Растїслав Моравськый, В пичÿнках му были Франкы З читавым ярьмом ґерманськым. Тай уєдно з Святополком, Князьом титульным Нїтрянськым, Ладять листок Мигальови – Быв тот цїсарь у Бізантську. Пишуть му у тÿм письмови, «…Ож уддавна ся змагавуть Побідити вни поганство. Завто просять сим посольством Д царьоградському дворови, Вбы найшли їм мудрых попÿв, Обы знали чилядь вчити Й навертати д християнству У славянськÿм языкови!» Кой скÿнчили му читати, Цїсарю прийшли на гадку Два шіковні кандидаты, Котрых мож было спокÿйно Ид славянÿм заганяти. Были вто два рÿдні браты, Кирил й Метод из Солуня, Ужек укі дипломаты. Кониць I. капітолы. Автор: ПЕТЬО БЕРЕШ 02 июля 2022 год
Вместе с вами мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/, ru Питьо Береш, в иных случаях будем обращаться в соответствующие инстанции (админам соц.сетей, и Суд).
