Чиришні
Цаблю з луйтров на чиришню,
На самого на вирьха;
Буду мати гривню лишню
Без обмана, без гріха.
Стану в вароши великум,
А не в нашому селі -
Заплатят ми там без крику,
Ош черваві тай малі.
Як продам єдну кошарку,
Буде гроший в ня ракаш -
Куплю милуй я подарку
И розкажу алдомаш.
Як продам кошарку другу,
Стану пан понад усі,
И повезу я подругу
З ресторана на таксі.
А як тритя щи продасться
По десятці кілограм,
То для повного для щастя
В ЗАГС заяву з нив подам!
А пак ляжеме на постіль…
Стовп паскудно затріщав,
Затріщали пак и кості,
Як з кошарков-им упав…
Я в палаті лежу білуй
У гіпсови, як герой…
Мила звонит на мобілу:
- Як ты?! Де ты?! Што ты?! Йой!
Зараз прийду! Што ти треба?
Из базара свіжина?
Я же гордий аж до неба -
Добра буде в ня жона!
Но, прийшла (што файні груди!)
Дала рота чмок-чмок-чмок;
А потому тыче блюдо
Повноє чиришиньок!
Так застыв-им, ги уд леду,
Но, сесе ми ’го любов…
Не тебе я в ЗАГС поведу,
Як пристигне бороцков!
Автор: Михайло Чухран
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ Михаил Чухран, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
