Я штось мало запоздив, хоть і много я не пив!?
З НОВЫМ РОКОМ
Новый Рук штось піловав,
Дуже скоро ся вказав.
Што шіковно вун надбіг,
Гі на голову ми сніг.
Зато я і запоздив.
Докі встав ай кавіль пив…
Пару дну злизав ми кось.
Довго шупався я штось.
На Новый Рук вінчованя,
Руснакум ґратулованя
Запоздили докус мало.
Заз три дны тото чекало.
В році поверх триста дну.
Ба ци много три? Ану!
Чуйте, што’м хотів пувісти.
Не накурто. Мош присісти.
Новый рук лем ся зачав,
Не пузно, бы’м вінчовав:
Із Сілвестром! З Новым Роком!
Бы не обыйшли вас боком
Добро, радость, а ще сміх!
І серинчі повный міх
Новый Рук вам подарує!
Ай здоровля най ся чує
У руках і у ногах!
Ани жура, ани страх
Бы од вам ся не ліпили!
Най поможуть Божі Силы!
З Новым Роком ґратулуву!
Щастя в здравії вінчуву!
Най бы каждому із вас
На цілый рук, не на час,
У жебах серинча была.
Од біды вас сокотила.
А од тому помагала,
Добро од вам притігала.
Засмійтеся, веселіться,
Паліньков не захлыцніться.
І заїчте смачно, файно.
Мулатлуйте – сесе айно.
Заспівайте, заиграйте,
Серинчу за хвуст імайте.
Лем юй піря не скубіть,
Не ревіть, та гі медвідь.
Попросити красно треба,
Збыхне од вам просто з неба.
І поможе руснакови,
Гі чіковови пудковы.
У серинчі сохташ є –
З добрыма людьми пстає.
Ще не пузно, з Новым Роком!
Ідім вперед скорым кроком.
Бы гі я, не запоздили,
Вчас, што треба поробили.
Вчинив діло, бався сміло,
Най бы довкул веселіло.
Сміх здоровля додає.
Смійтеся, кіть ся дає!
Зафіґлюйте, файну дяку
Запаліть лем у руснаку.
І так цілый рук новый,
Каждый руснак дорогий
Бы із грушми, сытый, вбратый,
На цімбору бов богатый!
Най здоровля в нюм кіпить,
Нич руснака не болить!
Автор: Володимир Рошко
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на автора; Володимир Рошко https://rusinskiimir.ru/ в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
