Русинская поэтесса Леся Адамова Стецович «ФРІШНОЄ МОЛОЧКО…»

Русинская поэтесса Леся Адамова Стецович «ФРІШНОЄ МОЛОЧКО…»

ФРІШНОЄ МОЛОЧКО...

...Ви́чур притули́вся ти́хо вд го́рам,
Со́нічко ся спря́тало край не́ба...
Та́ги бы йсе бы́ло іщи́ вчо́ра:
Дни́на я́рьня, фа́йна, свíтла, тéпла...

Ри́пнуть дви́рі в ня́ріці мали́нькуй,
Ввы́йдуть ба́бка з ка́нточков удну́,
Тя́жко вже ходи́ти дись стари́нькуй,
Бо пройшли́ вже пу́ть Вни не єдну́.

-Сла́ва Йсу́су Хри́сту! - ся покло́нять,
Ма́ма юй одкло́нять ся на йсе́.
У дзвуни́ци на недíлю в дзвóны дзво́нять...
Ба́бка ви́чур мо́лько свíжоє несé...

-Йще́ ся вам Барну́лька не втели́ла?-
Ти́хо звíдавуть ся бáбка нáс.
Мáмка бы вам мóлька надойи́ла...
-Ньи́т, йщи не прийшо́в юй ча́с.

Читаві погарчата ми дайте,
Наллю вам из шумом молочка,
Иппно ся за стул поусідайте,
В ташці штось юй глєдать йще рука.

-Напекла́ м днись сы́рникув смачни́нькых.
Ву́няла, з нас ка́ждому дала́.
-Бог ми вну́кув и́пных дав, чесни́нькых,
По єде́н дара́бчик вам взяла́...

-Ма́мо, та вни ма́вуть, слава Бо́гу, вши́тко!
Ба́никы і я дни́ська пекла́...
-Ба́бино смаку́є льíпше, ви́дко,
Позира́й, онь сли́на потекла́...

Бабку ви́чур дуже сьме чека́ли,
З же́ба фурт нам вунима́ли што́сь,
Вни для нас испря́таноє ма́ли,
"Файноту́ яку́сь" - вповíв бы тко́сь...

А кедь мáли час, та небыли́ці,
Поприка́зували и́пно нам старí,
Про "Води́лу", "Вовкуну́в", "Сяту́ води́цю"
Вíрили сьме в вши́тко! - бы́ли сьме малí...

-Ма́мо. Те́мно ся. Я Вас думу́в пове́ду,
Вбы́ сьте не упа́ли в темнотí...-
Ня́ньо узяли́ мали́ньку ба́нку ме́ду,
Ба́бці,бо рокы́ вже золотí...

...Я тямлю́ йсі дні споку́йні й милі,
Кой носи́ли ба́бка молочко́...
Заскріпíли ти́хо стáрі дви́рі -
Давнина́ в гадка́х прийшла́  краснó...

Автор: Леся Адамова Стецович pátek 6. května 2022 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения: Леся Адамова Стецович, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.

Добавить комментарий

Иконка левого меню