ВЫДБЫЛА СЯ ПРЕЗЕНТАЦІЯ "ОТЦЮЗНИНЫ" 29 юлія, у Ужгōрōдї, выдбыла ся презентація выдновленого журналу "Отцюзнина". Дїйство проходило Дōмі културы и нацїональных меншин. Исе мироприятя, орґанїзованоє Русинськым культурологічным клубом (Ю. Шипович) тай Закарпатськым обласным обществом им. Александра Духновича (Ю. Продан), скликало представникӯв усякых громадськых орґанїзацїй, културных дїячӯв тай другых людий, котрым інтересна карпаторусинська култура и бисїда. Окремо выдїлю знаных гōстюв. На презентації были Петро Медвідь - радник президенткы Словакії по дїлах русинӯв, редактор Лем.фм тай почесный голова Світовōй Рады Русинӯв, академік Пол Роберт Маґочій. Первым выступив Юрій Продан. Розказав за велику втрату про вшиткый русинськый народ - смирть ґенїального Михайла Чухрана. Тему прoдōвжив Євґенїй Жупан, голова Нарōднōй Рады Русинōв Закарпатя. Вӯн напомнив про смирть професора Ивана Туряницї тай секретаркы НРРЗ Марії Ярчич. Помянули сьме їх минутōв мōвчання. Дальше говорив Юрій Шипович голова "Русин-клубу" и редактор "Отцюзнины". Кидь накурто, Юрій Юрійович розказав за рōбōту над журналом, якый матеріал зайшōв у журнал, які є хыбы, и за вшитко што ся вдало тай не вдало реалізовати. План по дописованю, из слӯв Юрія Шиповича, вдало ся реалізовати. Журнал дӯстала чилядь из Верховины: бывшых Воловецького и Мижгӯрського райōну. Исе є дуже добре, ож журнал у тōму реґіōнї приняв ся из позитивом. Кидь говорити за матеріал, та його у "Отцюзнинї" доста на всякый "смак". Є вістї, інтерю, публіцистика, етноґрафія, худōжнї творы и кулінарный рецепт. Из мого туй ōпублікована курта статя на русальню пятницю тай стих на дану тематику. Дуже много матеріалу выд, прощенного бы, Михайла Чухрана. Михайло Михайлович быв єден из тых, тко мав читаво переживав и хōтїв видїти выпуск выдновленого журналу. Айбо не судило ся... Слово мали и почеснї гōстї. Професор Маґочій анонсовав онлайн енциклопедїю из шотландськыми колеґами. Дуже много радив на рахунок дальшого выпуску журнала. Петро Медвідь тоже высловив своє думаня, як дальше має функцїоновати журнал. Поговорив за ґраматичный варіант бисїды, якōв ся має выпущати журнал тай за языкōві перспективы на будучнōсть. Історик Володимир Фенич мав слово и розказав, як вӯн видит журнал у будучности, рōзуміє ся рубрикы, подача матеріалу и инше. Высловив ся, ож треба нам мати сайт, де будут публікації на русинську тематику. Говорив и за бисїду в журналї, як закликати май много автōрӯв тай пӯднимав другі темы. При выступі, Віра Кōбулей пōвіла, ож треба бы мати у журналї дїтōчу рубрику тай заявила, ож из первого септембра у ефері буде передача "Русинська файта" (бывш. " Русинська родина"), што дуже радує. Выступав и академік Михайло Белень. Розказав нам за памнятнї таблы, памнятник Духновичу и много чого інтересного. Слова мали и другі учасникы презентації, кōтрі говорили за успіх журналу, якісь його хыбы тай побажаня на будучнōсть. В кӯнци прещентації было пӯдписано дōгōвӯр про спōлупрацю миж ГО Русинський культурологічный клуб» тай ГО «Карпатський русин» (голова Василь Щербей). Дальше учасникы презентації зробили образчик на памнять. Цїлу презентацїю, вів пряму трансляцію на стōрінцї Rusyn.eu Константин Тимофеєв. Тōму, тко має дяку, годен презентацію увидїти. Хоче ся пōвісти, ож важнōсть выдновлення выпуску журналу "Отцюзнина" тяжко переōцїнити. Исе выдання выступат важным інструментом дїля всокоченя тай пропагованя русинськōй бисїды, културы тай національнōй ідентичности. На даный час, журнал єдиный в Пōдкарпатю дїє як платформа (печатна) дїля публікації публіцистичных тай худōжньых твōрӯв, што чинит возмoжнōсть дїля нашых авторӯв высловити своє думаня, позираня тай твōрчӯсть, а также стає оболоком до русинськōй културы дїля широкōй аудитōрії читачӯв. На останок хоче ся подяковати Русинськōму культурологічнōму клубу тай Обществу им. Александра Духновича за їхні старання и рōбōту по выднōвленї выпуску "Отцюзнины". Надїю, ож усї хыбы, из часом, вырішат ся и журнал буде жерелом вдoхнōвлїня дїля молодого пōкōлїня, майданчиком дїля твōрчōй роботы тай свого рода символом єднання русинськых літературных, културных, умільськых и научных дїячӯв. Желаєме дальшōй удачі тай пӯдпоры у вашӯй важнӯй рōбōтї на благо русинськōй културы! Из честованьом, Мигаль Чикивдя
Презентація выдновленого журналу "Отцюзнина" Ужгород, 29 юлія 2023. В суботу 29-го юла 2023-го року одбыла ся в ужгородьскім Центрі култур народностных меншын Закарпатя презентація першого чісла обновленого русиньского културно-белетрістічного журналу Отцюзнина. Журнал выходив уж в минулости, од 2016-го до 2018-го року, но через складны условія, котры Русины на Підкарпатю мають, його робота была перервана. Теперь подарило ся обновити роботу редакції вдяка проф. Павлови Робертови Маґочійови, котрый фінанчно забезпечів посередництвом фінанцій од меценатів друкованя журналу на два рокы, цілково вісем выдань. Отцюзнина Наш підкарпатьскый русиньскый журнал Отцюзнина выходить як кватралник із тіражов 500 фалатків. Головным редактором є Юрій Шиповіч, голова Русиньского културолоґічного клубу. Якраз тота орґанізація вєдно із Закарпатьскым областным науково-културолоґічным Обществом імени Александра Духновіча, котрого головов є Юрій Продан, суть выдавателями обновленого журналу. Журнал выдає ся на 40-ох сторінках, і обсягує як актулны темы, розговоры, так і русиньску історію, краєзнавство, етноґрафію, звычаї. Самособов, не хыбить ани сучасна література – проза і поезія. Діскусія і підписаня договору Подія, на котрій одпрезентовало ся перше по роках перервы выданя журналу, почало минутов тиха за недавно помершы русиньскы особности – Івана Туряницю, Михаіла Чухрана і Марію Ярчич. Пак о новім выданю бісідовав шефредактор журналу Юрій Шиповіч. По його словах приговорив ся і другый з выдавателів Юрій Продан. За тым проходила жыва і плодна діскусія, в рамках котрой участны оціньовали нововыданый журнал, але так само і подали конштруктівны пропозіції, што до будучіх чісел. Слово в діскусії взяли Павел Роберт Маґочій, Володимір Фенич, молодый писатель Мигаль Чикивдя, Михаіл Белень, Євген Жупан – голова Народной рады Русинів Закарпатя, Віра Кобулей, Петро Медвідь, і далшы. Наперек тому, же в діскусії нашли ся різны погляды, вшыткы оцінили, же выдаваня журналу ся обновило і беруть то як важный елемент в розвитку русиньского руху на Підкарпатю. Радостнов новинов є і конштатованя головного редактора, же наперек дакількорічній перерві по оголошіню выданя нового чісла вказав ся великый інтерес о журнал меджі чітателями, котры ціле нове выданя властно такой розобрали. На кінцю події быв пидписаный договор о співпраці меджі Русиньскым културолоґічным клубом і орґанізаційов Карпатьскый Русин, котрой головов є Василь Щербей. Тішыть нас, же і наперек тому, же іде война, Русины на Підкарпатю далше роблять на своїй ниві в можливостях, котры теперь мають, і підкарпатьскый русиньскый рух вдяка актівным орґанізаціям продовжує. ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА Образчик выд Петра Медвідя 30 июля 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
