Петро Медвидь. Программа на декабрь месяц 2022 года театра «Александра Духновича» в Словацком Пряшеве

Петро Медвидь. Программа на декабрь месяц 2022 года театра «Александра Духновича» в Словацком Пряшеве

Проґрам Театру Александра Духновіча в Пряшові на місяць децембер 2022

Приносиме вам проґрам Театру Александра Духновіча в Пряшові на місяць децембер 2022-го року.

1-го децембра 2022

Детектор лжи (Велика сцена, 19.00 год.)

Повісте собі, же о манжелстві знате вшытко? Досправды то так є? Або… може о манжелстві не знаме абсолутно нич? І манжелство може быти єдна велика незнама… А притім прекрасна комедія! Находиме ся в обывачці єдного класічного панелакового квартелю. Пані Надежда не знать найти одповідь на вопрос: Де мій муж Борис скрыв выплату? І так собі на поміч закличе домів гіпнотізера. Має пояснити справы, котры суть на першый погляд баналны. А пізніше і фаталны. Бо уж по хвілі знайде ся меджі небом і земльов. Ліпше повіджено – посеред таємніць тридцятьрічного манжелского одношіня. Тадь хто бы ся сперав покушіню спознати істинну правду і скрыты світы свого ціложывотного партнера? Нихто. І втогды ся іщі лем почнуть діла! Минулость шокує нашых героїв, метать їх до неочекованых сітуацій. Но публіка ся барз файні бавить! Та ці то в жывоті аж така перемога? Дізнати ся о нашых близкых досправды вшытко? Тверду правду? Як скінчіть тота сеанса несподіванок? Подарить ся загасити тот ґротесковый пожар манжелскых боротьб? Буде годен в многім простодушный гіпнотізер втечі із пазурів манжелского абсурду? Так лож, як і туга розкрыти правду, єдно і друге може быти про нас солодков наркотіков, котра ся за секунду змінить на смертну отрову. Успішній комедії зо сучасности домінують брілантны акторьскы выконаня протаґоністів русиньского театру. Суть поставлены на текстовій і сітуачній перемінливости. На бавліню ся. На дінаміці акторьской кооперації, іскривости словных несподіванок. Значіть! Театралный вечур повный доброй забавы, усміху, котрый вам з часу на час замерзне на роті, сміху і радостного обчутя ся може зачати!

7-го децембра 2022

Червена калина (Велика сцена, 19.00 год.)

Темы любви і войны капчають ся в творах Василія Шукшіна в ґротесковім образі нашой добы, де головный герой Єґор глядать новый жывот як рецідівіста пропущеный з арешту. В тій драмазітації його траґікомічных оповідань і новел крыє ся правда о індівідуалности вояка, котрый по войні залучать ся до сельской соціеты. Червена калина – то сімбол гріху, од котрого Єґор буде пробовати очістити ся, і знова найти свою достойность.

8-го децембра 2022

Любов до ближнього (Велика сцена, 19.00 год.)

Театер Александра Духновіча представлює інсценацію од єдного із найзнамішых російскых драматіків 20-го столітя Леоніда Николаєвіча Андреєва. Тота комедія вказує на абсурдность нашого світа і нонсенс жывота, де трафунковы поставы чекають на смерть нещастливця коло вычапу і страчають чутя і любов до ближнього.

16-го децембра 2022

„На руїнах“ (Велика сцена, 19.00 год., 1-ша премєра)

Тота легка водевіл комедія, котра є повна гуморных тіпів і характерів, музикы і танця, розповідать історію бездухого шляхтіця Рафаіла Смородина, котрый здідив немалый маєток на періферії, і дістане ся до сітуації, коли каждый буде хотіти прижывити ся на його богатстві. Пєся є в україньскім языку.

21-го децембра 2022

„На руїнах“ (Велика сцена, 19.00 год., 2-га премєра)

28-го децембра 2022

На ревізію (Велика сцена, 19.00 год.)

Остра сатірічна комедія о жывоті і роботі сільского старосты і о тім, як рішыв проблемы сільскых людей. В пєсі найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

29-го децембра 2022

Жобрацька опера (Велика сцена, 19.00 год.)

Жобрацька опера як комедія анґліцького драматурґа Джона Ґея была написана як пародія на великы оперы знаных театралных сцен, котра здобыла величезный успіх. В нашій інсценації ілуструєме оперету в середовиску злочінців як ундерґравндовый кабарет, де ся Мекіт званый Капітан, вождь банды бандітів, фраїркош, дістане до любовного трикутника.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Автор: Петро Медвидь 28 ноября 2022 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Петро Медвидь в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Left Menu Icon