Русинский поэт и писатель М. Чикивдя «Ци знаєте такых людий, што за них кажут бокораші? Видит ми ся, ож айно. Знаву и я чōлōвіка, што за нього кажут…»

Русинский поэт и писатель М. Чикивдя «Ци знаєте такых людий, што за них кажут бокораші? Видит ми ся, ож айно. Знаву и я чōлōвіка, што за нього кажут…»

БОКОРАШІ
(Долина Тереблї)

        Ци знаєте такых людий, што за них кажут бокораші? Видит ми ся, ож айно. Знаву и я чōлōвіка, што за нього кажут бокораш, айбо вӯн тоты бокоры на очи ни видїв и ни годен быв уже видїти. Но тай, правду кажучи, ци много чиляди знає, што значит слово «бокораш»? Старші люди ищи тямлят, а дакōтрі мōлōді за бокоры, бокорашӯв ниґда й не чули.  Та тко такі бокораші? Тото люди, што занимали ся сплавом дерева по ріках Карпат.

        Ниґда'м не видїв, як тото ся вшитко робило. Хыба на давных куртых відеах тай образчиках. По тых давных матеріалах мож нараз увидїти, ож професія бокораша тяжка тай опасна. Пиля Синевира давно май фунґовав музей хащі тай сплаву, айбо на типирь вӯн не фунґує. Дуже жаль, бо там бы ся вшиткым заінтересованым мож было дӯзнати дашто інтересноє за сякый нынї забытый «промысел». На нашых ріках лісосплав уже шуга не увидиме, хōть бы го орґанізовали у културно-фестивальных-туристично и другых цїлях, бо Водным кодексом Украйины (1995) вӯн заказанный. У пōслідньый раз плоты дōлю ріками пущали ищи у 60-70-х роках минулого сторочча. Пōтōму ōни выдыйшли у істōрію.

        Датко бы хōтїв не лише видїти образчикы, ай дӯзнати ся, як тото ся бокораші трудили, як талантовали из деревом. Не мнōгі нынї гōднї розказати за тяжку рōбōту бокорашӯв. Тōму дїля заінтересованых читачӯв подам очерк Г. Павлишина «Долиною Тереблѣ»  из часописа «Наш родный край» за 1925 рӯк. Що може быти май інформативно про нас, ги стаття написана у часы розцвіту роботы бокорашӯв? Туй простōв бисїдōв описанный цїлый процес рōботы из деревом и сплавом гӯрськōв рікōв. Очерк уже скоро 100 рӯчнōй давности!

ДОЛИНОЮ ТЕРЕБЛѢ

«Ой, бывайте здоровенькѣ, дѣточки дробненькѣ,
Бо я иду на бокоры, у горы высокѣ.
Поплыву я по Тереблѣ на сухом кымаку,
Принесу вам по колачу, колися поверну.
По Тереблѣ в славну Тису…
Гойкну, заспѣваю,
Ой, знай моя мила жоно,
Дому ся вертаю.»

     Так спѣвали бокорашѣ и рушилися в далеку дорогу. Йшли на роботу. На бокоры, аж на далеку верховину. Серед густых смерековых лѣсов, росположено в высоких горах лежало село Синевѣр. Туды змагалися нашѣ люде.

 Через довгу зиму в тых гӯстых лѣсах стяли много дерев. Обчистили од кожи, звозили до рѣки и наклали из них великѣ маглѣ. Весною и лѣтом звязовали тѣ дерева в бокоры, або плоты.

        Нашѣ бокорашѣ найшли тут звязано вже готовѣ плоты. Мало пдпочили и взялися до роботы.
 Перехристилися на бокорѣ, помолилися и пустили бокор долу водою. Вода тече тут быстро. Бокорашѣ мають гадковати, щобы не сталася даяка бѣда. Не розбився бокор, або не впали з него в глубоку воду.
 Оне не мають тут часу дивоватися красотѣ природы. Не дивлилися на ще зеленѣ склоны гор,  по котрых тут и там позвонювали овечки. Овчарѣ на трумбетах затяговали волоску.
 Усиловно працюючи оставили за собою и Нижню Колочаву.

 Из далеку пішно дивився на их трудну працю Менчул. Кто не знає из вас Менчул, ту нашу красну полонину. Из котроѣ можете заглянути на бѣлый Сигот и сѣрый замок в Хустѣ. И тѣ села мѣж садами, рѣки, якѣ вются змѣйками по долинах.

 Нашѣ бокорашѣ причепилися до берега мало одпочинути. Перед ними показалося мале слѣце. Хижѣ порозкиданѣ по горах, як звѣзды на небѣ. То Бовцаря, приселок Драгова. Говорять старѣ люде, що тут спочивав княз Раковцій утѣкаючи од нѣмецких войск.

 Село Драгово бокорашѣ плынули вже спокойнѣше. Вода стала нѣбы то тихѣйшою. Але мѣж селами Чумальово та Кричово, чекала на них опять тяжка робота. Приближалися жо зановського моста. То тут не раз приходилося им помучитися. Коли не уважали доста и причепили в мост. Та насувався бокор на бокор и загорожував дорогу.
 Щастливо поплыли под мостом, вже лишили села Колодне и Дулово и приближалися до Углѣ.

 Колодне маленьке село, аде має церков больше як 300 лѣт стару. В нѣй есть много памятников старых роков.
 Недоходя до угольського хутаря, опять причепили до берега бокорашѣ. Зняли шапки, и перехристилися. Над рѣкою стаяла низенька гора и на нѣй хрест.

Не давно на той горѣ стояв славный монастырь. В один час тут жили еписокпы и одсѣ правляли цѣлою Мараморощиною. Быв час, коли жило тут понад 300 монахов. Они мали велике газдовство по долинѣ Малоѣ и Великоѣ Угольки та полудневной збочѣ Менчула. Чули вы вже за сѣ долины. Приходѣте раз подивитися на нѣ.
 По малой Угольцѣ веде дорога на полонину. По дорозѣ найдете больше минеральных вод. Из сеѣ долины можеме перейти в долин Великоѣ Угольки. Там найдеме высокѣ бѣлѣ горы: Гребень, Чур, Копиця та Молочный. Сѣ горы суть вапнянѣ. Молочный одти мог достати и имя, що даколи текла з него бѣла вапяна вода, як бы молоко.

 В Молочном є много пещер, якѣ вырыла вода у вапнѣ. За сѣ пещеры говорять всякѣ страшнѣ казки. Що там сидить головный чорт, сокотить грōшѣ давного монастыря. Я в той пещерѣ быв, анѣ чорта, а анѣ грошей там не видѣв. За монастырь осталося в нас только нѣсколько казок, и хрест на горѣ «Монастырь» пригадує давну славу Углѣ.

 Бокорашѣ помолилися перед хрестом. Розложили ватру, напекли рѣпу. Закусили та заснули мало на березѣ. Было як раз полудне. Сонце стояло высоко, будьто бы смѣхалося из верху. И як бы ласкаво обнимало бокорашѣв.
 «Василю, ставай!» - пробудився Иван. Ще нам, брате, до вечера треба до Буштины доплысти.

 Скоренько посхоплювалися, перехристилися, одвязали бокоры та пустилиса в дальшу дорогу.
 Оставивши позадѣ село Тереблю, ōни были уже мѣє Унѣговом тай Урмезьовом. Перед ними зеленѣла вже широка долина Тисы. Над вечер лишили и Буштину и привязали бокоры вже до Тисы. Поблагодарили Бога, що им помог щастливо дойти. Собрали своѣ сокиры, мотузы, та вернли пѣшком назад дому. Не забыли анѣ за колач, що дѣти чекали.

 Сякый красный очерк за бокорашӯв и їх маршрут Тереблянськōв долинōв. Но туй май бӯльше ся описує сплав бокōрӯв дōлю рікōв тай села долины. Видит ся ми, ож сий інформації нам помало. Хосенно подасти дальшый очерк «Плоти.» И. Смердула из Бычкова, де ся пише, як правили плоты.

ПЛОТИ.

 Коли бы по тихеньки записати дакого, як то роблять плоти може й не знав бы одповѣсти. Ты лиш запитай верховинця, он тобѣ скаже. Одного року рубають лѣсы од самого пня. Другого року йдуть и притинають вершки тых зрубаных дерев.

 Третього року идуть и ōдрубують стовпля и знимають кору. Потōм спускають то дерево на рōвнину. А ци знаєте, чому то так роблять? Зато, бо коли бы за першим разом ōдрубали дерево ōд пня, а такой обчистили и спускали, тогда сыре и тяжке дерево само ишло бы долу дебрями та людий бы побило. Дерево пускають на рōвнину долу дебрями. Де не мож пускати, то ōдти возять на рōвнину. На рōвнинѣ, близб рѣки, складають в великѣ деревосклады. Потом прийдуть другѣ люди и збивають з того дерева плоти. Плоти роблять на таком  мѣсци, ōдки вода годна бы легко взятии. Беруть дерево и на березѣ рѣки складають в один ряд, одно коло другого. Тонкѣ кōнцѣ в однѣм кōнци, а товстѣ в другōм конци. Тих дерев кладуть в один ряд до 10 або 15 дараб. Потом на передѣ, то є в тонкōм кōнци кладуть в поперик кōлька дерев. Сѣ деревля поперечнѣ называють попругами. Тотѣ попруги прибивають до спōдных дерев, деревляными чопами.

 А заднѣ кōнцѣ плоти звязують кручеными гужвами з дерева. На передѣ и на заѣ кладуть опачини (весла). Так то роблять плоти.
 Тепер лише чекають коли буде велика вода. Щобі была велика вода до плотий, то зроблять велику гать. Гать быває и до 15 м глубока. Гать роблять на таком мысци, де сходяться два горбки, а мѣж ними тече рѣка. В долѣшном кōни покладуть через ту рѣку стѣну. А в той стѣнѣ роблять дверѣ.

 Коли воды є уже богато, то тогды выпускають єѣ гет. На се є призначений день коли мають выпускати воду. Того дня коли хотять выпустити воду, а бокорашѣуже стоять кождій на своѣй дарабѣ. Як вода прийшла велика, то забирає тотѣ плоти, якѣ стояли попри рѣки.

 Коли звезли плоти на бōльшу рѣку, то и там лишають. Другѣ бокорашѣ приходять и везуть далѣ, де потрѣбно. На великой рѣцѣ складають бōльше тих дараб. То вже назівають кайлаками. кайлаки везуть далеко за границю.

Нам Вам буде на хосен ися інформація. Богужаль, уже ниґда не увидиме бокорашӯв при рōбōтї. А выдсносно ищи не так давно, професія бокораша была єдна из немногых актуальных професій Подкарпатя. Но што сь приходит, а што сь выдходит. Главноє про нас знати и тямити тото, што уже выдыйшло, бо ōто часть нашōї істōрії.

Автор: Мигаль Чикивдя 2023 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий

Left Menu Icon