БЕРЕЗНИЦЬКІ ЄВРЕЇ.
Рōблю над книжкōв про євреїв нашого краю, Подкарпатя.
Уже много часу прӯйшло, айбо ищи’м ни годен зобрати вшиткых матеріал, довести дїло до кӯнця. Бог знає, коли усьо дошōрю. А выдасти книжку – тото уже друга тема. Треба раз зробити до шōру рукопис.
Думаву, ож пиловати ся нїщо.
И зась ся днись вертав до дїточых спōминӯв. Яв’им си думати, ба коли’м у первый раз узнав за євреїв?
За народ, котрый у каждōму русинськōму селови быв другый по числу людности, а пак траґічно пропав. Нарōд из свойив реліґійōв, звыками тай пӯдузятницькым хыстом.
Тямлю, як’им из няньом тай мамōв ишōв у Мужикӯв, та зад “Ливтиря” у чійōму сь гōрōдци, у бережку, были дві плиты, гробы. Яв’им звїдати, ож чого туй людий похоронили тай чōму, а не, ги усїх, у тынови. Верло ми ся было в очи, ож плиты были инчакі, ни такі, ги в тынах. Тоды’м учув выд нашых, ож там похорōнинї євреї тай ипен там у них быв тын, айбо лиш ся тоты плиты лишили. Тоды ми было дуже чудно тото чути. Быв бы ютуб, ци інтернет, та бизӯвне, ож гладав бы’м за них, тко тото такі. Айбо того ищи ни было, убпставало ся лише вызвідōвовати, приставляти.
У бабы Мынькōвōй за євреїв пак’им учув цїлу истōрію, доты’м понятя ни мав, які ōни были, чим ся занимали.
Тоды ми баба розказала, ож у селі жило дись 3-4. дисяткы многочисельных фамілій, усього бӯльше, ги 300. чōлōвік.
Усї ōни, кроме рӯднōй бисіды, знали русинську. Свободно говорили по-нашōму.
Майбӯльше їх жило у цинтрі села. У цинтрі, за рікōв, была у них бузня, мало дальше, у биризі, тын. Тын, за котрый я уже споминав.
Жили выдносно скромно, но были май богаті выд руснакӯв. Были у них великі, файнї хыжі на центральнӯй улици села, и в самӯй цинтрі.Мали много земли, на якӯй робили, но й часто давали в оренду, авадь продавали нашӯй чиляди.
У многых євреїв были бōвты.
- Занимали ся ōни садоводством, конярством, дакōтрі были лісорубами и остолашами.
- Пирві дві фамілії Гōльда и Манса занимали ся конярством.
- Дале была родина Симы, у кōтрōї дома быв бōвт, де продавали усякі виды товару.
- Розя была бідна, жила на зарінку.
- Манс тоже жив бідно, мав много дїти.
- Лая жила на цинтрі, у ниї пекли колачі.
- Миндиль продавав у бōвті.
- Мошко занимав ся конярством.
- Лайзер жив у кӯнци села, и тоже занимав ся конярством.
- У Ітины пекли хліб, дале продавали го у бōвтї Симы.
- Тōвстя была проста ґаздыня.
Айбо кӯнчив ся їх живот у Березниках.
Хōть и была вōйна, айбо ни кывали їх. Уже пак у 44. прийшли жандармы и усїх євреїв зӯгнали на село, на зарінок.
Было чути страшный плач и йойк…
Изганяли їх на зарінок, дале єдных повезли на машинах, другых пӯгнали пішком. Вшиткых у лаґеря…
Наша чилядь наостанок прōбовала дарити їм дарункы, дасти їдїня, ци што сь инше, айбо жандармы ни пӯдпущали.
Удало ся было спасти малых дїти, котрым вдало ся утїкнути при выдправцї, айбо уто были єденицї. Єдного баба затямила, звати го было Мендель. Вӯн пак жив якыйсь час у Сваляві, айбо пак ни знати куды ся переселив, бо пак за нього ни было чути нич.
Тоды, ищи малōму, дуже ми жаль стало, ож чōму из ними сякоє вчинили. А типирь, кōй талантув из матеріалами тай документами за євреїв Подкарпатя, ищи май рōзумів, яка тото была траґидїя.
Ни пувім, ож євреї были дуже дōбрі из руснаками.
Было што сь паскудноє, но й дащо доброє.
Айбо факт того, ож такый народ жив у нас, и наша стара чилядь ищи го тямит.
На останок. Пишу “євреї”, хōть у нас сяк, за сись народ, нитко ни каже. Мушу через тото, бо инак фейсбук видит “враждебние высказывания”.
Дітōчі спомины: М.Чикивдя 27. новембра 2021 р.
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).
