Я РОДИВСЯ І ВЫРОС ТУЙ

Я родився і вырос туй,

У Мараморошськуй долині,

Де Тиса з гур воды несе,

Бурлящі тай студині.

Она тече субі у даль,

Вбы ся з Дунайом злити,

І ластовкы берегулькы,

Туй люблят гнізда вити.

Я раб земли й не ганьба ми,

Й не буду ся ганьбити,

Бо я єм твоє дітинча,

І буду тя любити.

Любити зимлю і сийсь край,

Де мамка ня родила,

Де ня плекала молоком,

І в пеленкы вповила.

Де ня водила за собов,

Потихинькы за руку,

Колим бетежный быв в ночи,

Не спала несла муку.

Я богу дякую за всьо,

За серинчу і ласку,

І за русинськый отчый край,

Де маю свою частку.

Я АНГЕЛА УЗРІВ У СНОВИ

Я ангела узрів у снови,

Вун по русинськы ми казав,

Вбім бисіду си материнську,

Докы лиш жию честовав.

Русине тям своє коріня!

Й Господь поможе ти в пути.

Вбы вічным было ти насіня,

Из малку своє сокоти.

Добавить комментарий

Ваш адрес email не будет опубликован. Обязательные поля помечены *

Иконка левого меню