МАРАМОРОШ
Мараморош - чōрні горы,
Край гӯрськый, полонина...
З гӯр исходит на долины,
Зимля рӯдна в ня єдна.
Лиш єдна, де гнали вӯці,
Много было їх давно.
Де усяды по опшарях
Выздриш красноє вино.
Край, де сӯль усе копали,
Пак возили, де хыбит.
Край, де чилядь у талантах,
Нитко нагле не сидит.
Туйкы штрека всяды была,
Дерево возили нив.
Рікōв бокоры спущали,
Датко йсе си затямив.
Туй шумлят студинї зворы,
Доста чистōї воды.
Туй жиют усякі люди,
Вшиткі в мирі, без біды.
Де копицї на долинї
Й оборогы по гранках.
Яфӯн, ягӯд, трав тай грибӯв -
Вшитко найдеш по лісах.
Туйкы бродит запах сіна
Й свіжоскошенōй травы.
Тӯлько в літі є роботы,
Хōть ими ся головы.
Шоры з ріпōв на сотинах
Поросли вже буряном.
Тыча в шорикы забито,
Даґде пахне доганом.
Быля тай кладні по селах,
Дись-не-дись є ворох дрōв,
Инші складені в дрыварню,
Выдты в шпор, и будь здōрōв.
Туй коровы з стайни чути,
Хōдят кури по двōру.
Й свині в кецку сут, ніврōку,
Там вычікувт си пōру.
Туй будит ся солонина,
Вариме смачный токан.
Такі стравы у руснакӯв,
Ōнь позавидит їм пан.
Свіжым хлібом в хыжи пахне,
Пече кісто ся, й боґач.
Кидь тōбі ся йсе не любит,
Не руснак ись, перебач.
Церква в каждōму селови,
Кличут нас туды звон`ы.
Даґде ступні ся упстали,
Даже й водяні млины.
Мараморош - чōрні горы,
Жиє туйкы наш народ.
Сохрани нам, Боже, зимлю,
Даруй радосный живот.
Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
