ГОЛОС БОРЖАВЫ
Даколи ми ся видит, ош рікы знавут тямити. Ōни течут не просто по зимли – ōни течут крӯзь рокы, крӯзь сердця, крӯзь вшитко, що мы называєме животом.
Боржава тямит мене, и тых, тко быв до мене.
Ōна виділа босоногых дітий, що бігали по єї мілчинам, виділа жӯн, що мыли на плитях цуря и пущали по вōді білі полотна – ги бы молитвы. Ōна чула, як лиґіні співали юй пӯд звіздами, як кōні пили из ний перед вōйнōв…
Типирь у нюй плывут пласмасōві склянкы – ōни не знавут молитв. Ōни не мавут запаха, не знавут ганьбы. А вода фурт плыне, плыне, и тихо говорит:
- Я ищи тямлю, як вы ня любили…
Даколи я стōву на єї берегови – в тишині, де лиш віхор колыше вербу. И мині ся видит, ош ōна говорит изōмнōв шептаньом, но я не годен пōрōзуміти слӯв – бо єї бисіда майдавна выд вшиткых бисід.
Кажда цятка єї воды – ги шорик из давнōй книжкы, де тінта уже выблідніла, айбо смысыл ся впстав.
Я ї зазвідав: - Чōму ты всьо нам пробачаш?
А ōна ся лиш колыснула, и в сьому кываньови я пōрōзумів: юй не треба пробачати – ōна просто тече.
Усьо що лепавоє, ōна несе. Усьо, що живоє, – лишат у памняти.
Коли над долинōв лігат мрак, єї голос чинит ся похожым на голос матери, що співат колыскōву своим нечесным дітям.
А коли паде дощ, мині ся видит – исе не небо реве. Исе Боржава споминат.
У єї голосови – и бӯль, и світло, и давна мудрōсть: не гнівай зимлю, не каламуть вōду, не рубай дерево, що дасть ти тінь.
Ōна не судит – просто тече, обтікає усьо людськоє, ги час.
Я видів, як, коли ся розвидняло, сонячный выбликс ліг на поверьхнōсть, и ріка ясніла ся, ги бы ся зась родила. И тогды я пōняв: закі тече Боржава, сись край живый.
И я – вєдно из ним.
Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
