ПОДАРКЫ ПО БŌВТАХ Не устиг ся зачати декабрь, а по бовтах, по полицях, уже ся яли появляти подаркы на Миколая тай Новый рӯк. Много дуже красных коробок из цукрами. Чим дальше ид Микулам, тым подаркӯв май бӯльше. У котрый бōвт не зайдеш, усяды ся у очи вержут праздничнї коробкы, чōкōладнї Дїды Морозы и зайчикы, кōтрі так хōтят видїти дїти у возорах на Микулы тай пӯд ялинкōв, на Новый рӯк. А пōслїдньый тыждинь перед Миколайом тото якраз пік: усякі бавкы, цукры, апельсины и много чого інтересного тай смачного чекат праздник. Кōй им быв малый, подаркӯв на привалках хōть не было тӯлько много, ги типирь, айбо итак читаво. Заставало вшиткым. Май главноє – цукры у папірьовӯй краснӯй мальованӯй кōрōбцї тай чōкōладнї Дїды Морозы. Нагадав си, бōвты у тот період читаво пахли апельсинами тай мандаринами. Усьо красно напаровано. Упставало ся лиш Миколайови прийти и набрати пōдаркӯв, убы пак їх поночи дїтьом поносити. Усе-м давно знав, чим ся пōявлят подаркы-солодич у бōвтови, значит тото ся парує Миколайови. Думав-им си тоды, ож Миколай выходит на контакт из бōвташками, та дōгōвōрує ся кӯлько му тай што треба. А як инак? Май ми было інтересно, чого тото подаркы у бōвт треба, кидь Миколай чудовториць, та годен на пряму си орґанїзовати подаркы у міх чесным дїтьом. А сяк мусит усьо через бōвт робити, та ци устигне, из каждого бōвта подарокы забрати ,а пак ищи за нӯч вшитко розносити. Вопрōсӯв у ня было дуже читаво, и на всї ми старали ся дома дасти ōтвіты. Інтересовало ня, кидь Миколай забрав ми записку, де-м написав, што хōчу, убы ми принїс, та ци найдет ōто у бōвтї? Часто у декабрю якраз пиля сята роззирав-им полицї, та рōзумів, ож того, што я хōчу не є. Пак-им звїдав, а як ми Миколай тото принесе, кидь у бōвтї не є? Выдкы узьме? Казали ми, ож хыбы ни є, Миколай ми тото узьме у другōму бōвтї. Думав си, доста ся набігат. А як устигне усї бōвты убыйти? Устигне, бо Миколай сятый, та вшитко годен. А коли Миколай приходит подаркы забрати? Ци платит за них гроші? Тко исе вшитко знає? Казали ми, ож Миколай ся парує, за пару днӯв до того, як му треба буде носити подаркы, каждōй ночи приходит, та набират си у міх подаркы. А из бōвташками ся дōгōвōрує. Усьо тото, што не мож было пояснити, казало ся, ож Миколай чудотворный, та вшитко годен. Я вірив, тай вірили другі дїти. А як ушиткі чикали Миколая, не є слӯв, убы передасти. Подаркы, усякі бавкы тай апельсины - тото дїточа радӯсть тай великоє чеканя Миколая. Коли видиш краснї коробкы, нараз у споминах верташ ся у дїтōчі рокы. Солодич, запах апельсинӯв по бовтах, симвōлізуют прихōдящі радӯснї сяткы тай Новый рӯк. А про дїти тото не лише радōсть ай чудо, у котроє ревно вірили. Та най бы было сяк и на дале: у бовтах было читаво подаркӯв, а Миколай їх брав тай носив вшиткым чесным дїтьом. Автор: М.Чикивдя 06 децембра 2023 год
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
