ПЕРВОЄ ДЕЦЕМБРА Первый динь зимы, первоє децембра. Слякōть, студино. Не сяка ся зима вшиткым любит. Кōй лиш упаде снїг, тоды ся усьым любит красота дōвкола. Заснїженї гранкы гӯр, білоє поле, дерева у білых дубльонках из кōвпаками. Айбо сяка ся краса держит не дōвго. Убы лиш мало сонце пригріло, вмоминті снїг ся зачне топити, а по путях ся учинит страшна лопыцанка, де не мож пӯти, та ногы не намочити. Май ліпше бы у сяку пōгōду сидїти си дома, никуды не выходити. Найти си якыйсь невеликый талант у хыжи, розокласти огне, та сидїти у теплōтї. Айбо як тото часто є, кидь робочый динь, наш чōлōвік не буде сидїти у супокою. Найде си рōбōту як у хыжи так и на двōрі, на опшарю. Ци файна погода, ци пӯдла, и на двурі ся што сь найде такоє, што треба буде зробити. Мусай лишати теплу хыжу, убрати ся як май добре, та у сыру пōгōду ходити пō двōру. Но кōй уже настанут морозы, тото другоє дїло. Ипен тоды мож си найти много роботы. И не хыба, ож студїнь. Даже и добре, бо файно, сухо, мож талантовати без біды. У селї ищи датко гнӯй по пōлю повозит, а ткō сь пӯде дрыва готовити. Дрыва паровати у зимі май добре, бо не драча, не рӯща из листьом не є, мож си супокӯйно робити. Рано устати, пӯти, та різати до потемку. Но много роботы уже выдпало, ги тото было давно, як ми розказовали. У зимі и тыча готовили, дрыва, сїно на самōтяжках носили. Люди робили своє, жоны своє, не припочивали си и в зимі. Таланту было много, типирь из того мало ся лишило. Я, коли-м быв малый, фурт им чикав зиму, а ипен ї первый динь. Первоє децембра. А усе ми треба было, кидь первоє число, та уже має быти снїг. Кидь го не было, тото уже не порядок. Я си ищи у новемброви преставляв, як упаде снїг, пӯду ся сувати, буду бабу снїгōву ліпити. Вшитко так, ги хōтїв тоды ачий каждый дїтвак. У зимі, чим лиш притрясло снїгом, уже ми нараз треба было сани. Айбо што, кидь тото мало притрясе, а пак ся нараз топит. Было так, ож упаде доста файный, айбо сувати ся итак не мож, бо пригріло, снїг помняк, и на митер ся не прōсунеш, сани ся зōпрут. На суваня треба было мороз тай читавый снїг, но його часто у первых числах децембра не было. Но завто быв снїг, из котрого качав им бабу снїгōву. Не єдна была пӯд грезном, пиля капуры, усяды, де ми паровало скачати. А пак по тōму зайду до теплōй хыжі, снїжаный, мокрый. Кӯлько ся чекало, убы уже поталантовати, побавити ся у зимі. Дяка скоро не переходила, хōтїло ся ити на двӯр и другого дне. А пак зась и зась. Кобы лиш зима была, ги Бог приказав. Мало ліпити снїгōву бабу, пак при морозови ся сувати, тоды было дуже красно. Айбо як тото часто є, снїг падав, пак ся топив, пак зась упаде и слякōть така, што най Бог заварує. Но коли зачинат ся правдива зима, из морозами, ги має быти, тото было красно, айбо як студино. Чикати ї усе треба было дōвго. А яка зима буде сього рōку, увидиме. Кобы лиш менше слякоти. Вōліє приморозити. Увидиме... Автор: М.Чикивдя
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
