ТАЙНЫ ДОВГОЛІТЯ Дідо Митро не быв йогом, Из села вӱн родом. И не втямив, ож як дожыв До стопядесят годӱв. Журналісты налетіли, Ги пчолы на квітя. - Челядь хотіла бы знати Секрет довголітя. Мы позвідаєме дашто, А вы дайте нам отвіт, Як ся вам вдало дожыти У здоровлю тӱлько літ? Які виды спорту были Май любимі вами? - Молодым усе я бігав За красными дївками. Ци держали сьте дієту? Ци їли сьте фрукты, Ци были в вашому меню Модифіковані продукты? - Послїдньый вопрос не розуміву, Челядочко мила. Мав им хуть усе уд тому, Што баба ладила. Через се у нашӱм дворї Не є роботы смерти, Бо з бôвта нич мы не їме, Лем то што зродить в керті. Коровы наші дояться По три раз на днину. Ги ріни, куры несуть яєць, Шовдарь є и солонина. З їдôв, діду,у вас порядок, Бодай всі так мали. Што повісте про алкоголь? Ци міру сьте знали? Дохторы кажуть,ож то зло И десь правду мавуть. Многі, што міру не найшли, Дочасно умеравуть. - Ниґда паленку й вино Я за зло не ряховав. Што ся в погар наливало, За здоровля м выпивав. В бôвті я не куповав Из нафты “казьонку”. Из слив, грушок и вина Гнавим самогонку. Робив я сесе подполно, Вбы и муцна была, И бы мене при сюм дїлї Міліція не ймила. Даколи вечӱр лишу дома Косу вадь мотыку, И в корчмі з хлопцями схоснуву Пару штамперлику. -Та яка бы гулянка не была, Усе знав им, де двӱр наш. Вадитися з свойôв бабôв Ниґда я не мав сохташ. Ціґаретлі не купуву, Курю піпу з доганом, Што посадили сьме у керті Вєдно з кумом Иваном. Нікотину, што обстаєся Од мойої піпы, Стачило бы повбивати Всі коні на світі. А про интимноє жытя, Што сьте повісти гонны? - Не жаловалася ниґда Олена, Ани иншї жоны. Желаєме вам, діду Митре, Здоровля сокотити, И многі рокы в благодати З нами ще прожыти. Хлопці, не кажіть дурницю. Итак од думок сохну, Ож кедь буду ще ся й сокотити, Та ниґда не здохну! Автор: Иван Ситар 05 августа 2023 год
Вместе с вами мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/, Иван Ситар, в иных случаях будем обращаться в соответствующие инстанции (админам соц.сетей, и Суд).
