ГАЛУШКИ
Русна́к лю́бить галушки́,
Гі оса́ лі́тні грушки́.
І із си́ром, і із ма́ком,
Тре́пле з превели́ким сма́ком.
Із капу́стов і шкварка́ми,
Напиха́в би ся рука́ми.
А із бри́нзов як смаку́вуть,
На́б’є че́рево – не зду́вуть.
Ми́су би спаса́в, вадь дві́,
Сма́чно влі́ті і взімі́.
Ла́вор би їх змолоти́в,
Ни́кому би не лиши́в.
Фа́йні по́рзні і масні́,
Привиджя́вуться ще й в сні́.
Галушки́ би їв усе́,
Бо смаку́є ’му сесе́.
Ми́че в рот вун галушки́,
Та гі фі́ґлі, вадь смішки́.
Буде́ ла́вор, сте́рпле вши́тко,
Се моло́тник, на́рас ви́дко.
Гі у бе́здну ували́в,
Хоть крихту́ би нам лиши́в.
Рот ’му хо́дить, гі млине́ць,
Галушка́м буде́ кони́ць.
Ще янна́, у рот ’ю ве́р,
Поза́д то́го ся уте́р.
Благода́ть така́ ’го и́мать,
Ду́шу до небе́с пудни́мать.
І у че́реві дубрі́,
Ля́же че́ревом гурі́.
Дрі́мле, сня́ться галушки́,
Не дівки́ і не фляшки́.
Бо русна́ка фурт корти́ть,
Так, вонь се́рце ’го боли́ть.
Змолоти́ти галушо́к,
Ба ци тре́ба ще діво́к?
На сю стра́ву дя́ку ма́є –
Молоди́ця спочива́є.
Вун би в та́нірь позера́в,
Ти́хо сли́ну промика́в,
Ра́довався галушка́м,
Мно́го пу́ще, гі дівка́м.
У русна́ку є сохта́ш,
Што не ку́пиш, не прода́ш.
Дві вни ма́вуть забага́нки,
Та гі па́ра до топа́нки.
Пе́рша – би би́ла робо́та,
Дру́га – галушки́ до ро́та.
Мі́сять галушки́ уся́ко,
Зна́вуть спра́вити вшеля́ко.
Ме́тані т’ти наладя́ть,
А вадь рі́зані зваря́ть.
Су́кані, із молоко́м,
З улайо́м і чесноко́м.
Щи́пані суть галушки́,
Нич не ду́майте дівки́.
Є із чо́го убира́ти,
Смакова́ти, благова́ти.
За день русна́к нароби́вся,
Та гі рінґішпі́л крути́вся.
Зму́чився і зголодні́в,
Як ся ка́же, вонь упрі́в.
Опстає́ся за стул сі́сти,
Галушка́ми ся наї́сти.
На ота́ву пуйти́ спа́ти,
І із то́го ра́дость ма́ти.
Наш русна́к без галушо́к,
Гі без пі́ря воробо́к –
Не літа́ти, не роби́ти.
Як без галушо́к прожи́ти?
Дай лем ти ’му убира́ти:
Што би ра́дше мав стрепа́ти?
Ве́ржеся на галушки́,
На смак лі́пші, гі дівки́.
Автор: Володимир Рошко
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на автора; Володимир Рошко https://rusinskiimir.ru/ в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
