"ЙÔВНОТАНКА І РІНҐЛОТА"
На обы́стю, у двôрі́,
Тя́гнуться, рôсту́ть гурі́
Йôвнота́нка і рінґло́та,
Посаджє́ні пе́ла пло́та.
Кві́тнуть, плốдять і зиму́вуть,
Ай непу́дло себе́ чу́вуть.
Із рока́ми розросли́ся,
Гôлузьо́м переплели́ся.
Я́блыка, сливки́ присти́гнуть,
Черваки́ їдя́ть, што всти́гнуть.
И́ншоє ґазды́ збира́вуть,
Похôсну́вуть то, што ма́вуть.
Та гі се́стры в’є́дно жы́ли,
Ни нашто́ ся не твори́ли.
Два́дцять рốку десь мину́ло,
Ме́жи ни́ма штôсь заду́ло.
Ва́дитися зачали́,
Коли́ ву́росли, сплели́.
– Со́нце за́стуєш мені́,
Бджюл є бу́лше на тôбі́.
Дố’мні хпа́єся кôрі́ня,
А од тốму і насі́ня
Пророста́є пу́до мнốв.
Ви́диш, стôвп ми ся зогнốв.
Ка́жда лем за се́бе зба́є,
Сли́вка я́блунку друча́є.
А тота́ не поліви́ть,
На рінґло́ту фурт дави́ть.
Ва́да, вốйна у двôрі́,
Ско́рше ву́рости гурі́.
Єдно́ дру́гого вломи́ти,
Бы самốму лі́пше жы́ти.
Ско́ро зра́на і до нốчі
Лем умі́тувуть у вốчі.
З ко́го бу́лше є хусна́?
Ку́лько вро́дить, ци рясна́?
Йôвнота́нка ся хвали́ть:
З я́блык вар ся фурт вари́ть.
Че́рез зи́му їдя́ть ї́х,
Смако́м ра́дувуть усі́х.
Продаву́ть на базарі́,
Їх купу́вуть панії́.
Зна́ву грốші зароби́ти,
Ґазды́ з то́го го́дни жы́ти.
А ты, сли́вко, што з тя є́?
Хусна́ ма́ло устає́.
Ка́же на тото́ рінґло́та:
Ты не ви́диш да́ле ’д пло́та.
Діточки́ сливки́ їдя́ть,
Кіть не зо́рвуть, убаля́ть.
Попаду́ть, ґазда́ збира́є
До гордо́ва. З то́го ма́є
По́верьх сто лі́тру кери́ні.
Се не я́блыка зеле́ні.
З то́го па́ліньку звари́ть,
Што чміли́ть, а ще й гори́ть.
Фа́йні грốші се, небо́го.
Ай ярьо́ваня без то́го
Не обы́йдеся в селі́ –
Ді́ти зна́вуть се малі́.
Та гі ве́рба, ты дурна́,
Тво́я би́сіда чудна́.
Сли́вка честь вели́ку ма́є,
Ґазда́ ’ї не ôбріза́є.
Тебе́ зна́вуть обстрычи́,
Што напу́дишся вночи́.
Сли́вка з я́блункôв вôю́вуть,
Єдно́ дру́гого не чу́вуть.
Кôму́ пра́вду ту дати́?
Ци мош и́стину найти́?
Збо́ку слу́хаш сісю́ ва́ду,
Ко ту пе́рший, ко ізза́ду?
Убі́ дві хосе́н даву́ть,
Дốкі рốдять – най росту́ть.
Ка́ждый свốю ціну́ ма́є,
І розу́мный сесе́ зна́є.
Што доро́жоє – хліб-во́да?
Говори́ти за то чко́да.
Автор: Володимир Рошко
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на автора; Володимир Рошко https://rusinskiimir.ru/ в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
