РУСНАЦЬКИЙ ПЛУТ Ще за ру́ських тото́ бы́ло, Коли́ гертанки́ дави́ло Ка́ждого, ко ту прийшốв. Чу́до ту чужа́к найшốв. Плут. Обгороджє́ный дву́р. Збыткова́лися – Се му́р. А воро́тниці які́. Сы́пали на нас гурькі́ про́зывки: “курку́ль”, вадь “па́н”. Уціря́ли, гі бара́н, Вốчі на на́ші капу́ры. – Чий од сві́та такі́ му́ры пра́влять в сьо́му Закарпа́тю, од нас, ва́шых ру́ських бра́тю? Три́млеме сохта́ш стары́й. Плут вели́кий ци малы́́й, З ло́зы, дощо́к вадь із дрốту, Не дава́в найти́ клопо́ту. Бы т’ти ку́ри не ходи́ли, Сусідо́вам не чини́ли біду́, гре́бучи ушы́тко. І чужы́х бы в тя не ви́дко. Од путя́ – капу́ра, плу́т. Не коля́чий сесе́ дру́т. Тварь обы́стя, честь ґазды́ – Од ву́лици парады́. Упозі́рує красно́. В Кра́ю звы́чай сись давно́. Бы’сь в селі́ не заганьби́вся, Кра́сный плут усе́ лади́вся. Не цу́равый, не погни́лый, Про лю́дськоє во́ко ми́лый. Бы твуй пес не укуси́в, Не напу́див, замасти́в кого́сь во́нка на путьо́ви. Ци в сусі́дьох кугуто́ви шы́ю не перекуси́в. Лем свуй двур бы сокоти́в. З ке́цка пу́ститься свіня́, Іми́ти ї – то пув дня́, Кіть в обы́стю ниє́ пло́та. Сесе́ жу́ра – не робо́та. На́то плут кладу́ть в селі́, Бы не ву́бігли малі́ ді́ти на орса́ґ з двора́, Дốкі ма́ти, вадь стара́, Ци варя́ть, ци попора́вуть, Две́рьці клю́чкôв закапча́вуть. Мы ся не замурова́ли, Бы не ві́діли, не зна́ли, Што ро́биме, што в нас є́. Нам і сво́го устає́. Позера́йте, пốйте в дву́р, Се лем плут, дốкус не му́р. Хи́жа ся не замыка́є, А капу́рка утворя́є. Гốстюм ра́ді мы усе́. Затямі́ть субі́ сесе́. Мы ґазды́, не друтарі́, Плут не тя́гнеме гурі́. Шор в обы́стю даєме́, Про худо́бу кладеме́. Се межа́ і се пара́да. Ґазду́ ви́дко, душа́ ра́да. До поря́дку мы навче́ні, За́то пло́том огороджє́ні. Ціфру́єме, фарбиме́, Кра́сні пло́ты кладеме́. Вốчум є на чум спочи́ти. Ле́гко мош їх утвори́ти. Пốйте удну́, зайді́ть у дву́р, Штефітки́ – тото́ не му́р. У нас плут не од люди́. Штôсь ти тре́ба? Пой сюды́. Автор: Володимир Рошко
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Володимир Рошко в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.
