А гриб коло гриба ги нüч коло хыжі
ги сон коло втомы ги палинка в рóті
вертатися треба та як бы сь не хóтів
а гриб коло гриба и щи два и тритьый
а в хащи ся тимніє кукат зозуля
и годинка тікат ги серце у грудьох
и дощ ся май пущат и гыд тя напудив
а ты ся не верташ бо грибы тя водят
кошар уже повный и ріже у пличі
тяжкый гатіжак и вже рукы подерті
такого сь не відів не ввидиш до смерти
туй гриб коло гриба и каждый тя кличе
а нüч ся насуват и вже нич не видко
душа леденіє й дере тя насподі
и вже розумієш не грибы тя водят
и шепче ти розум ош ниськы не встигнеш
не уйдеш из сьої заклятої хащі
и грибы пропадут и ты туй зогниєш
кось выє далеко щось тисне за шию
розкапчуєш куртку и рвеш на си одіж
дорогы ниє туй а голос тя кличе
поникаш у ташку самі мухоморы
вже чуєш як ангелы молятся хором
лиш огник далекый ги свічка у церкви
лиш огник заблимат и вже ся не боиш
бо є дись на світі ота що тя любит
пüдеш дóлі звором и уйдеш де люди
три дны тя не было й засосы на грудьох
и ко ти повірит ош быв ись на грибы
ош дись тя водило ош дись тя носило
а в тебе ниє ни бажання ни силы
комусь розказати ош гриб коло гриба
Автор: Василий Кузан 24.09.17 г.
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ и автора произведения: Василь Кузан, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
