Хресный ход
До сятого отца Йова, хресный ход іде,
Сам отиць наш, преподобный, тих люди веде.
Богу Вышньому вгодив віров і ділами,
І при жизни і типир славный чудесами.
Люди ідут хресным ходом, молятся, співают.
У свойых піснях-молитвах Бога прославляют.
Молятся за свої нужды і за всьый наш край
Бы і наш народ русинськый попадав у Рай.
Йдут старі із діточками, "Боже поможи!
Всім ко трудится для Тебе, в Угольку дуйти."
Б'є каміня їхні ногы, ныют мозулі
Сядут мало, попочинут, на сыруй траві.
Дале впят із образа́ми терпеливо йдут,
Сятя́т зимлю молитвами, ще й христы несут.
То їм радо світит сонце, то їх кропит дощ
Чилядь добра їм выносит голубці тай борщ.
А як дуйдут до Сятого, змучині, щасливі,
Будут мощі лобызати люди терпеливі.
Там ся будут всі молити цілу нуч тай динь.
Слава Богу, в людськых душах ще горит огинь.
Ще ся чилядь наша молит, вірує, жиє,
Ще нам Госпудь Милосердный дыхати дає
Сокотім си праву віру, Ійова завіт,
"Вы до ня і послі смерти, гі д живому йдіт..."
Автор: Василий Кричфалуший
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Василий Кричфалуший, в иных случаях будем обращаться в соответствующие инстанции (админам соц.сетей, и Суд).
