Хрестити ня вчила бабка, дітвака малого
В імня Отца, і Сына, і Духа Сятого,
Хрестилася на молитві, тай коли лігала
Сим знаме́нієм сятым, постіль осіняла .
Хрестила всіх ко ішов, уд її порога
Бы їм была биз біды усяка дорога
Із машинов ім куй быв, вна ня проважала
Все молитвов, коло ворут, з хрестом "доганяла"
Казала ми що в Хрестови є велика сила
Бо Христова Кров Свята, так го осятила
"Перехрести́!" Все казала, їду тай питя,
Бы в здоровлю йшли ти годы́ земного житя
Чистовала Хрест Сятый ни лиш моя бабка
В нашых предку, много віку, была така гадка.
Клали хресты у дворах, тай попри дорогы
Абы фрас із свойов злобов обламав си рогы.
З хрестом чилядь уставала, тай із ним лігали,
І на собі хрест малинькый на ниточці мали.
Як бы тяжко вни ни жили, но мали терпіня
Каждый мусит "нести хрест", ко хоче спасіня.
А на Здвигы, фурт ішли, до церкви сятої.
Кланялися..., лобызати хрест на аналої,
Пуст держали, чистовали Христове розп'яття.
Бо Вун рукы простя́гши вповів: "Сяк вас люблю браття!"
Автор: Василий Кричфалуший
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения Василий Кричфалуший, в иных случаях будем обращаться в соответствующие инстанции (админам соц.сетей, и Суд).
