"Пришта за руснацькый курагôв". Было йсе гет-гет давно'. У єдно' руснацькоє сêло', уноровили ся у ночи iзыйти з гӳр вôвкы' на добычу. Они, тягли у хащу із людськых хльiвӳв усяку худôбу. Што лиш чилядь ни чинила, айбо рôвты вôвкӳв ни мош было сперты и из тôв бiдôв, ни годны были дати сôбi рады. Ни раз прôбовалы люди боронити сêло, айбо вôвкы' усе роздерли каждого, ко ставав їм на пути. Дӳйшло' ид тôму, што уже і у бiлый дêнь, чилядь бояла ся уйти вон, бо легко мош было навыйти' на вôвкӳв у свôму обыстю. Айбо біда, на сьôму ни кӳнчила ся - скоро i дїти уже пропадали. Лиш і чути было реваня и йôйканя у тӳм сêлї, бо хыжі обставали бêз дїтинкы, а дворы бêз маржинкы! Нїшто казати, читаву суєту і журу мала тота чилядь. Нич їм ни обставало, лиш усїм уєдно молити ся Гôсподу Бôгу і просити Го, вбы учинив чудо, тай даяк усокотив їх уд тôї страшнôї напасти. Так оно и было: у каждӳв хыжи лляла ся сердечна молитва и Сотворитêль ни лишив сêло у бідї. Кôй назад напали вôвкы' на сêло - чилядь у страховы іщи май сильно воздавала гôрячi молитвы' Бôгу. Рас лиш, чувуть они страшный рев, поникавуть у вôзӳр, а там, бурый мêдвідь - Царь карпатськых хащӳв - прийшôв боронити чилядь. Став на заднї лабы, читавый ги гора мêдвідь, а пêрêдньôв лабôв кôй ударить, такуй нараз зас два-тры вôвкы' падали мêртві'... Кôй убыв и вожака їх, другі вôвкы', притрощили свôї хвôсты і уха, тай у страхови імили ся утїкати у хащу. Прôбôвали даяк пôтӳм вôвкы, назат докучати чиляди, айбо Бог усе заганяв у сêло Боронитêля-Мêдвêдя. Сяк и ізбавили ся люди уд тôї біды. Дуже ся радовала тота Наша чилядь и уд тôвды, вбы сьме тямили за тото вêликоє Божоє чудо, на сяткы почали вити на кураговы три пантликы: Єден "СИНЬЫЙ" - бо ісе фарба Неба, де жыве Отыць Наш Небесный, котрый ниґда ни лишать нас у бідї; другы пантлик быв "БІЛЫЙ" - (знак чистоты), Бо тота пришта ся стала у зимі, коли уся земля, ги кôй білôв парнôв была прикрыта снїгом; а третьый пантлик быв "ЧЕРЛЕНЫЙ" - ги кой симбол горячôї любви и сêрдêчнôї молитвы за ушытку тоту чилядь, крôв котрых лляла ся у тяжкі про Наш нарюд дны. Завто' и на Нашюм прапôрї видиме иппинцї ісї фарбы', а у цêнтрї и Черленого Мêдвêдя - Царя Карпат, котрый и дале сокотить Наш Нарюд уд усього Злого. Поприказовав: Петьо Береш, 20. януара 2021 рока. Христос Раждается! Кідь дако буде хотїти, усе мош буде дашто у текстови поладити, дописати).
Вместе с вами мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/, ru Питьо Береш, в иных случаях будем обращаться в соответствующие инстанции (админам соц.сетей, и Суд).
