Русинские традиции с Михаилом Чикивдя Поливанка: Великодный сохташ 

Русинские традиции с Михаилом Чикивдя Поливанка: Великодный сохташ 

На великōднї сяткы руснакы мавут читаво звыкȳв тай обрядȳв. Видит ми ся, ож великодный сохташ май богатый выд ушиткых другых реліґійно-обрядовых, родинных тай иншыхнашых традицій. Нагадати си, приміром, за великōднї ōгнї, кōтрі палят ся у читвирь, авадь май часто из суботы на нидїлю, на Великдинь. Авадь як ґаздынї, тоже у читвирь авадь субōту, печут паскы, при тōму мавут читаво обрядȳв тай ритуальных дїйств, убы зробити рōбōту, ги треба. Дїти фарбили яйця, а пак увичирі у субōту складовав ся великодный кошар, де мала быти паска, свічка тай усякоє смачноє їдїня, ги приміром шōйт, пікниця, сыр, яйця, и много чого другого.

Но хōчу туй написати за такый руснацькый великодный звык, ги поливанка. У дїтōчі рокы исе была діля ня майвеселоє а радостноє дїйство, котроє-м фурт дуже чекав. На великодный понидїлок усе-м ранинько уставав, напущав у склянку воды, а на крышцї пробивав рупку, убы вода текла. Из склянкōв шікōвно-м біг поливати нашых хыжных, кажучи при тōму: «Христос Воскрес!» Они в отвіт ся выдкланьовали: «Воістину Воскрес!» – и дяковали. Пак, тямлю, баба си тоже напущала у дашто воды та тоже ня мало поливала. Казала ми: «Най тя пȳллю, убы-сь здоровый быв, тай убы ся на тя короста ни имала».

Поливати ся у нас сохтуют другого тай тритього праздничного дне. Но у великодный понидїлок майчитаво, активно. Руснакы вірят, ож тоды вода є цїлюща, выд кōтрōї чилядня буде здоровоє. А тко у великōднї сяткы ни буде пȳллятый, та на того ся короста имит, тōму мусай ся поливати.

Но выд коли ся сись звык у нас прияв? Што вȳн симвōлізує? Чув им стару чилядь приказовати, ож кōй воскрес Христос, та дїти бігали улицями, радостно гōйкавучи: «Христос Воскрес!». Тото дуже мириґовало жидȳв. Тōму они брали вōду та поливали дїти, убы пōвтїкали та ни говорили за Ісуса. Сяк было каждого рōку и переросло у звык, котрый дȳйшōв до нас, лиш уже инак, перекручено. Втратив ся му первоначальный вид.

Хōть давно ся поливала и старша чилядь, айбо як давно, так и типирь исе быв звык май бȳльше діля молодых. Было принято, ож у понидїлок лиґінї мавут поливати дївок, а у вȳторок – дївкы хлōпцюв. Хлōпцї ся ворошили и ходили ґрупами уличками, выд хыжі до хыжі, усяде, де живе нивыддата дївка. Там ї вшиткі поливали и йшли дале. Каждȳй дївцї было важно, убы была пȳллята у понидїлок, бо вірила, ож тоды ся точно выддасть. Завто выходили на улицю та чекали, коли лиґінї прийдут. А поливанка давно была дуже читава! Брали деривлянї відра та пōвнї лляли. Было й такоє, ож имлят та и в ріку задрылявут. Тōму за пару минут ушиткі были мōкрі доґде ниткы.

У вȳторок тоже была поливанка, айбо уже май послаба. Тоды дївкы поливали лиґинюв, а они в отвіт ньит. Тай старша чилядь поливала ся, лиш ни так, ги моложава, а май мало, тай казали при тōму: «Христос Воскрес! Воістину Воскрес!»

Поливати ся сохтовали ни лише у селах, ай и у варошах. Айбо там уже было усьо инако. Хлōпцї ходили поливати дївок тай ґаздынь, лиш ни вōдōв, ги по селах, ай порфіном (духами, одеколоном). Кōй приходили, та спершу казали: 

Быв им у садōчку,
Видїв фіалōчку
Зачала всыхати…
Дозволите пȳлляти?

На што їм казали: «Дозволяєме!» И тоды вже лиґінї могли пōдуханити дївку тай ґаздыню, кōтрі зо свого боку нахыляли гōлōву, убы духы трапляли на вōлōся, а ни платя, бо гōднї ся были упстати плямы. За сим «поливаньом» май малым хлōпцям давали крашанкы тай плитку, а лиґінюв кликали за стȳл.

Но ни усяды поливанкы были тай сут на великōднї сяткы. У дакотрых селах ся поливают на Юря. Є ищи приказка: «Юря, Юря, мокроє цуря». На Юря поливают ся ипен так, лиш дївкам тоже мож брати вōду та «давати здачу».  Тōму поливают ся дївкы из хлōпцями тай часто самі хлōпцї межи сōбōв – улиця на улицю. Симвōлічно ся сохтуют подрискати вōдōв и старші, убы здоровыми быти.

А ци сут поливанкы  у днешный час? Айно, лиш ни такі, ги давно. Ни мож пōвісти, ож сись звык уже выдыйшōв, айбо ни поливают ся так дуже, ги колись. Выдмират традиція поливати ся у старшых.

Файно ся сохранив сись звык межи молодыми хлōпцями тай дївками. Знаву, ож даколи така поливанка є, ож ни в кōтрȳй улици ни є пōрōху, усяды бōлōтя. Тямлю, коли-м ходив в ошкōлу, та купиме з цімборами у патицї великі шпріцы, набереме у них воды, та поливаєме дївок, дōкі нас учитилькы ни застанут. А пак, по уроках, на улици. Сяк ипен ся и типирь робит. Читаво є инструментȳв про поливанку. Мож хосновати склянкы, відра, а мож си купити спеціальнї пістолеты тай великі пушкы, де наливат ся вода. Так, ги й было давно, у понидїлок хлōпцї хōдят поливати дївок, а у вȳторок навборот. Лиш часто вшиткі ся поливавут межи сōбōв ворохом.

Ци читава поливанка, ци слаба, читаво зависит и выд погоды. Кидь Великдинь у рōцї пȳзно, та и тепло май буде, тоды ся читаво поливавут. Но тоды, кōй Паска скоро, та студїнь, уже мало кого мож увидїти з вōдōв на улици. Хыба є и у «проґресивных» старшых, кōтрі заказувут дїтям, кидь и файна погода, ити на поливанку. Кажут, ож тото ся лише дурнї поливавут. Лиш, видит ми ся, ож кōтрі сяк кажут, та тоже ни сут дуже рōзумными.

Но як бы ни было, сись великодный звык сохранив ся до днись тай занимат важноє місто у живōтї карпатськых русинȳв. Мнōгі з нас из теплōтōв споминавут свōю, ищи дїтōчу поливанку. Тай типирь, хōть симвōлічно, айбо у понидїлок подрискавут свойих рōдичȳв вōдōв, убы были здōрōві, тай короста ся на них ни ймала!

Автор: Михаил Чикивдя

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий

Иконка левого меню