ДЕЦА У НОТАРЯ
Тридцять рокув ходять у Дравці,
наші люди й з-за границі.
Йдуть из вариша и села,
в корчму ,,Деца у нотаря''.
На машинах старых й новых,
на біціґлях тай донґовах.
Дись на возах и пішком,
а майбульше - таксійом.
Йдуть чиновникы у власти,
політикы й депутаты.
Дохторы, учителі,
міліцішты и круті.
Йдуть мадяры и словакы,
німці, чехы и полякы.
Вшиткі украйинці й руснакы,
за столом їдять єднако.
Лысі, стрыжені, патлаті,
по-простому й модно убраті.
Як старі, так молоді,
їсти люблять там усі.
Боґрач, банош, крумплі, левеш,
палачінты й бундаш кенєр.
Лечо, перкельт и кочоню,
човлент, голубці, пасулю.
Шовдарь, пікницю и рыбу,
шашлик, кнедликы тай грибы.
Стейк, лаваш, рис ,,різі-бізі'' -
стравы фіномні и свіжі.
Їдять, чамкавуть и хлепчуть,
забивавуть в рот тай мечуть.
Жвуть, кусавуть, румеґавуть,
межи сим и запивавуть.
Вином, віскі, бренді, джином,
текілов, мартіні, румом.
Пивом, палинков, лікйором,
настоянков й самогоном.
Айбо, стуйте, цурі гов,
я штось мало не забов.
У корчмі файный є музей,
най ся спряче и Бродвей.
Голлівуд из Боллівудом,
уніміли бы з сим чудом.
Дуже файно там й бетярсько,
наяву так гибы у казці.
У каждум закуті, кругом,
липнуть фіґлі ракашом.
Сміх челядника бере,
крутить, убертать и грызе.
Куськать, скомче, треся, пучить,
морить, ґребить, тисне, мучить.
Радусть лізе в серце й душу,
што сміятися лиш мусай.
Фест наонадів їх шіковный,
Павло Чучка, што молодшый.
З Баранинцюв повный вуз,
фіґлюв в Ужгород привуз.
По секрету, абы не у голос,
маву добру комусь новость.
Кого тягне у Європу,
котра по сусідству з боку.
Утлевийл - паспорт ЄС,
єдно в корчмі из чудес.
Но, не задарь, вто бизувно,
мож купити там спокуйно.
Лиш най буде фурт при собі,
вто што вшиткі носять в жебі.
Кіть комусь уже интересно,
бігом в Ужгород на децу!
Автор: Gyula Csólent
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения:Gyula Csólent, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
