ВИННІ СОНЕТЫ
Росте в нас у каждого вино,
без нього у дворі пусто.
Од Ізабеллы до Мерло –
шлиякых сортув доста.
Вино солодкоє ги мед,
у нас го п‘ють ги воду.
Вино – єдна з любимых тем,
у нашого народу.
Ціну винови знає тот,
котрый из ним нараблять.
Має хосен из нього й толк,
бо наструй му добавлять.
Многым вино є душі,
и я його дуже люблю.
Айбо, тямити мавуть усі –
фурт мусай знати міру.
Вино челядника п‘янить,
не каждого єднако.
Єдных у голову чмелить,
другым уднимать лабы.
Кось из великых указав,
што: ,,Истина – у винови!‘‘
Видко, рекламов удрабляв –
винарю-цімборови.
Росте у Севлюши вино,
домака ипно родить.
Секреты знавуть усі його –
севлюшські виноробы.
Яло бы спомнити за них,
валовшно бы и знати.
Фразы и фамилиї їх –
у нотес записати.
,,Пити вино – возьміть у привычку,
айбо – погар, а – не відро!‘‘
Пан дохтор, Михайло Поличко,
вшиткым наказує в шато.
,,Вино – смакує в холодкови,
пуд файну музику и танець!
Из цімборами в ракашови –
каже Федор Павлишинець.
,,Нич не коштує буженина,
без літра доброго вина
Постулат Йожефа Фуделлы –
од ныні раз и навхтема.
,,Упити дотричі, лиш мусай,
кіть нащивити зайшов кось!”.
Сякый сохташ у Сергія Куса,
зайдіть, попробуйте, ануш.
Погарчик файного винця,
не похыбить никому.
Сяк єдна баба испасла,
в коргазі, діда у комі…
Файных люди у Севлюши много,
я йсе казав уже не раз.
Прості и знані виноробы,
живуть бизувно й серед нас.
Каждый из них, бизувно – мештер,
добрый и славный винороб.
Абы став рекордом – йотталітер,
най їм помагать Господь Бог!
Писав я в шорикы куплеты,
з канчовом доброго вина.
А пак нарано од сонетув,
штось так боліла голова…
Винні сонеты? Ци не винні?
Не дає спокую мені.
Кіть ниє истины у винови,
товды здоровля – у воді?!
Автор: Gyula Csólent
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/ и автора произведения:Gyula Csólent, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
