НАШІ БАБКЫ...
В оболок вечур позерать. Вже місяць
Звіздам розказує казку,
Рукы старинькі из ласкôв штось мíсять:
Рóбить на кíсто заквáску.
Лáвор з причинôв плахтôв прикрыє,
Щÿтку сячéну поклáде,
Рукы од кіста водичкôв помыє,
Пак одпочити присяде.
Рáно у пéцови паскы печýться,
Бáникы з мáком и сыром ,
Бáбка ся мóлить: "Най ми вдадýться"
Сята най прóйдуть из миром"...
Шôвдарі в шпáйзі, пікниця буджєна,
Шойт, солонины дарабы,
В гóнцях прикрытых є масть натоплена
Вже хосновaти порá бы.
Бíблія жôвта, старинька, протéрта-
Бáбка на шíфон ї клáла,
"Вбы не могли ї случáйно роздéрти
Дїти малí " - так казáла...
Вéчур з пасла гнав быйтарь все корóвы-
Мíдяні дзвýнкы співáли,
Вдкрыта капýра, водá у відрóви
Нáшу корóвку чекáли.
В бáбкы нам фáйно усе смаковáло
Вшытко, што вна нам давáла,
"Свіжого мóлька, вд корóвкы, на мáло,"
В фíнджятко нам наливáла.
Пáхла на зaгорді иншак травичка
Пиля старинької хыжі,
Свíжа з колóдязя чиста водичка,
Пес и мацурикы рыжі.
Чýти як в стайни квічáть зась пацята-
Бáбка прийшла покормити:
Льє їм помыї в малі валувчáта,
Сíна пуд них постелити...
Пéршый погáр сливовиці наляв ми
Няньо у нáшої бáбкы,
Дыханя зпéрло, жар груди залляв ми-
Хліб закусити дарáбчик...
А у зимі колядкы, Бетлегéмы,
Вéчур Святый вєдно з ними,
Фрíшность морóзна приходить нарéмно
Вдкрытими ними дверима...
Я лем у дóброму згадуву бáбку
Дóбру и щиру, сідиньку,
Ї співанкы и прекрáсну колядку
Хыжку малý и стариньку...
А коли прийду на єї могилу-
Як теперь жыву розкáжу...
Спóкуй дає ми то, а тілу силу,
Што юй зась дýшу укáжу....
Автор : Леся Адамова Стецович pátek 26. dubna 2019 г.
Ідея стиха Копинець Олександр
Обращик найшла на просторах інтернета и загнала Maria Makhanets. Красно дякуву.
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ и автора произведения: Леся Адамова, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
