Вплітáє динь молóчні пáнтликы у нÿч,
Сон вéртать ся туды - ýдкідь прийшóв.
Взяла недíля од субóты ключ -
Одкрыла двирі, обы динь новый зайшóв.
Усíвся áнгел-стрáжный на балкóн,
На вáрош рáньый мóвчкы си позéрать.
Не розумíє людськый дíвод і закóн,
Слезý, што истеклá, крылóм изтéрать.
Такый прекрáсный свíт вчинив Отéць -
Бери, та жый спoкÿйно і префáйно!..
Лем злóба вкрáла добрóту з сердéць,
Едéм зробити на Землú вже нереáльно.
Сидів си ангел і на вшытко позерáв:
Што фрáс в людськуй подóбі пÿдло твóрить!
Спасáти дýші силы вже не мáв!
Бо чúлядь од ненáвисти вже мóрить...
Ци втó задýмав вшытко сáм Премоцный Бóг -
Обы поколотило ся у свíті?
Йсе тáк з людьми ведé Вÿн діалóг,
Обы тямили, што написано в Завíті?
Обы изясь ся навернýла добротá
Любов і людяность, і вíра моцна в дýші,
Сердéчна щирость, приязнь, простота -
Без них - гий без воды на сýші...
Сидíв си áнгел і на вáрош позирáв,
Виднíло ся вже читаво усягды...
А люд у вáроши в недíлю дóвше спáв,
Глядáвучи у снáх остáткы прáвды..
@ Леся Адамова Стецович neděle 9. února 2025
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ и автора произведения: Леся Адамова, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
