Г Е Н Т Е Ш
-1-
Вшыткі ножі наострині
И клинкы великі,
Лаворы вже приладжині
И корыта вшиткі.
Суль и пириць, лист лавровый,
Кипячена вода,
И помÿcт з дощок фестовый,
Стойить на колодах.
Гентеш прийде все израна
На дворі йщи тéмно,
Бо робота йся старана,
Сложна и нарéмна.
Знає добре вÿн, як треба
Свинча заколоти,
Квик абы не быв до неба,
Без жалю й гÿркоти.
Пустит кров, най стече в лавор
Акуратно, чисто.
И на кавіль має право,
Й деці туй є місто.
А пак сирсть огньом палят,
Кипятком змивавут,
Шкрепчуть, чистять и изясь
Водов поливавут.
Гентеш робить йсе не сам -
Помÿчникув має,
Айбо май главнішый вÿн -
Вшыткым управляє.
Ріже, ділить, четвертує,
Корыто наповнять,
Файно, иппно вÿн гарує,
Най го люди помнять.
Вже ґаздынька зась несе,
Децу для фатьовув,
Йсе од студини спасе
Хлопцюв стопудово!
В лаворах усі кишкы,
Треба їх спущати,
Мыти, чистити, в банькы,
Вбы пак хосновати.
Солонины пóлоткы
Файно насолити,
Намастити чесноком -
Вто буде будити.
-2-
Шовдарі ушиткі тоже
В суль и маринаду,
На кочоню буде кожа,
В шойт ушытко клáдуть.
Всі шуршат, што аж ся курить,
Тай кіпит робота,
Нитко нич ся не загурят:
Вшытко, ги "по дротах"!
Свіжину ґаздынька жарить,
Пахне вже цибуля,
Лем мацур ся нич не шарит,
З шоку вочи впулять.
Сядуть мало испочити,
Тай заїсти мало,
Доста много йщи робити
Из йсьым вшыткым бстало.
Настроєніє - дай Боже!
Вшыткі, ги в азарті.
Встигне ся, кедь Бог поможе:
Вже йсьме не на старті!
Мнясо мелють на пікницю,
Ґершликы варять ся,
Ґаздик цьомать молодицю,
Вочи їм искрять ся.
Вже на шойт кипить што має:
Голова и кожа,
Поливка онь укипає,
На міш-маш похожа.
Мнясо, гуркалув, кишкы,
Робить ся пікнúця,
Изварині вже гуркы,
Йсе вже лем дрÿбниця.
Вшытко добре перемыти,
Мало похарити,
Чистым свіжину прикрыти,
Мож уже й спочити.
Йщи пошкварити шкваркы
Вбы масть в хыжи мати,
Вонка світят вже зіркы -
Мож бы йти вже спати.
Коли ріже ся свиня -
Треба нарабляти!
Абы пак добрятину
Все на сятка мати!
Автор: Леся Адамова Стецович pátek 6. prosince 2019
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ и автора произведения: Леся Адамова, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
