БЕ́ТЯРЫ В КРИСА́НЯХ...
У каждого фатьова быти має
Крисаня, но а ліпше - двí!
Клеба́н придасть солíдности - йсе зна́є
Поря́дный й и́ппный ка́ждый чоловíк!
Кой на лопóвці дорогá криса́ня
Сидить, гий вля́та и пару́є фест йому́ -
Убе́рне ся за ним йще кажда копыса́ня,
Фатюв в калапі - изчалує не єдну!
Криса́ні чи́таво давно носили,
Біта́нґы, хлопы ста́рші й леґінí...
Їх куповали, честовали й сокоти́ли,
Калапы были для фатьовув фест ціннí!
Краснó и шилия́ко паради́ли
Малі и чи́таві пара́дні клебаны́,
За ма́шликом перо́ ряби́стоє втісни́ли
И гордо їх носили, гий паны.
До церквы лем нову клеба́ню брали,
Туды носили фест парадноє вбраня́.
У Храмі го из у́цтов изнимали,
Кланявучи ся Богу за дар дня...
Кой ся здорóвкали - крисаню припyдня́ли
Крихту́ руко́в из свої головы́ -
Сесь дíвод и́ппный - вшы́ткі хло́пы зна́ли -
Култу́ра была в них зало́жена в крови́!
Кала́п, клебан, клобо́ук ава́дь криса́ню -
За милу душу фест носив любый фатю́в!
Кедь ище красный быв, та кажду "босорканю"
Вун исто "из путя́" извю́в! )))
P. S. Наші Няньо, прощені би, любили носити клебаны... И я люблю носити кала́пы. Маю їх десь 5-6...)))
© Леся Адамова Стецович úterý 16. ledna 2024
На обращику фатьовы из Раховщины...с. Ділове.
Фото: Б. Криштул
Вместе с вами, мы сделаем Русинский Мир лучше!
При копировании данного материала, либо использования в любом виде (печатном, аудио, видео) на своих ресурсах, просьба указывать гиперссылку на источник https://rusinskiimir.ru/ и автора произведения: Леся Адамова, в иных случаях будем обращаться в соответствующие инстанции (админам соц.сетей, и Суд). Фото использованы из открытых источников интернет пространства.
