М. Чикивдя о сжигании листвы в Карпатах «Єднōв из главных еколоґічных хыб, котра ся докыват до каждого, тото є паліня листя тай буряну…»

М. Чикивдя о сжигании листвы в Карпатах «Єднōв из главных еколоґічных хыб, котра ся докыват до каждого, тото є паліня листя тай буряну…»

ШТО РОБИЛИ ИЗ ЛИСТОМ?

    Єднōв из главных еколоґічных хыб, котра ся докыват до каждого, тото є паліня листя тай буряну. Еколоґы фурт гōвōрят про шкōду выд того дыму. Ищи выд огнища може ся имити паллаґ та пӯти пожар,  тай є ищи много другых наслідкӯв. На днешный динь принято читаво “еколоґічных закōнӯв”, на пӯдставі якых повысили штрафы. Типирь чилядня пувість, ож, а де го дїти, мусай палити, инак тото ни буде. Ясноє дїло, компосты правити у нас ищи ни зачали, еколоґічнї звїданя, жаль, сут про нас ни дуже актуалнї, бо про тото треба дїтям зачинати говорити у садику, пак у шкōлі, пак у університетах , ци колледжах. Но исе уже друга тема. Нарас приходит у гōлōву, а що из листьом робили давно?

      У нас быв такый звык, ож лист ся згрібав, а пак нїс ся на гнӯй, пак там перегнивав. Такуй ся так чинило удобриво.  Туйкы и быв компост. Тко садив часнок, тōму треба было вер нього насыпати фест листя.

     Тай давно листя треба было мати опшарю. Гия го было читаво. Причина в маржинї. Кидь у яри тай літї худоба пасла ся на толоках, та выдколи восени застудит, ударят морозы,  выд тоды худōбу круглосуточно держали у стайни. Тōму люди ходили на кӯсницї, ид хамникам, убы нагребсти листу. Треба го было читаво, бо як кōвпӯт рано-вичӯр, так треба пӯд коровы стелити. А кōй ся утелит,  кōвпут ищи и на пōлудне. У многых было пō дві коровы, ни кажу уже за вӯцї, ягнята. Стає ясно, ож паровало ся листя читаво. Май ліпшоє было ліщанковоє тай буковоє.

      Кōй ся пӯдчищало на кӯсниях, та тот лист ся згрібав у ворохы, а пак ся носив у веретах у хамник и там ся высыпав. Палили лист хыба тоды, кидь го было далеко носити. Айбо лише на огнищах, тай дуже сокотили, убы огинь паллаґом ни пӯшōв, ни вчинив ся пожар. Тямлю, як ищи адде говорили дїдове, ож лист треба у хамника высыпати, та най там перегниват, бо ōно ищи выд себе тепло выдїлят.

    Бурян, быля, так ги типирь, ясно, ож ни палили. Кōй быв колгосп, убы  жона мало костеревы нажала си кōрōві, та кидь бы ї были застали, могла тоды забыти за платню. Были сякі  пӯдлі случаї. Годен и я пувісти, так ги старый дїдо, бо застав’им, ож бывало и єднōй сотины ни было, де бы быля лишили, усьо ся жало. Читаво буряну возило ся думӯв та давало ся тоже худōбі. 

    Но а типирь, кōй худобы по селах дуже мало, та уже и палят тот бурян тай быля. Лист тоже ни згрібавут та ни мечут на гнӯй, бо и гнōву того ни є. Єдно, ож по кӯсницях го ни дуже палят, бо мало ся уже и кӯсниць лишило. Полишали ся, позарастали. Май погано, ож кōй на опшарю палит ся листя,  чилядня ищи верже туды и инше смітя, котроє палити ни мож. 

    Ги еколоґ, пувім, ож шкода выд дыму листя тай буряну є, бо читаво у ньому є чадного ґазу, оксидӯв азōту, пōрōху и тд. Хōть тото ни робит великый вплыв на зміну клімата, айбо годно вызывати хвороты з дыханьом тай алерґії.

Автор: М. ЧИКИВДЯ 17 ноября 2021 год

Вместе с вами, мы сделаем Русинский Мир лучше!

При копировании данного материала, либо использования в любом виде (печатном, аудио, видео) на своих ресурсах, просьба указывать источник https://rusinskiimir.ru/  и автора произведения Михаил Чикивдя, в иных случаях будем обращаться в соответствующие инстанции (админам соц.сетей, и Суд).Фото использованы из открытых источников интернет пространства.

Добавить комментарий

Иконка левого меню